اسلام آباد میں خاتون کو بچاتے ہوئے پاک فضائیہ کے گروپ کیپٹن عاصم طارق شہید، ملزم فرار

اسلام آباد: وفاقی دارالحکومت میں ایک خاتون کو مبینہ طور پر اغوا کی کوشش سے بچاتے ہوئے پاک فضائیہ کے گروپ کیپٹن عاصم طارق شہید ہوگئے، جبکہ واقعے کے بعد ملزم فرار ہونے میں کامیاب ہوگیا۔

پولیس کے مطابق افسوسناک واقعہ اسلام آباد کے نائنتھ ایونیو پر پیش آیا، جہاں گروپ کیپٹن عاصم طارق نے ایک موٹرسائیکل سوار شخص کو خاتون کا ہاتھ کھینچتے ہوئے دیکھا۔ صورتحال دیکھ کر وہ فوری طور پر مداخلت کے لیے رکے، جس پر خاتون موقع سے گاڑی کی دوسری جانب بھاگ گئی۔

ابتدائی تحقیقات کے مطابق مبینہ ملزم نے گروپ کیپٹن عاصم طارق سے تلخ کلامی کی اور بعد ازاں ان پر فائرنگ کر دی۔ وہ شدید زخمی ہوئے اور زخموں کی تاب نہ لاتے ہوئے شہید ہوگئے، جبکہ ملزم موقع سے فرار ہوگیا۔

متاثرہ خاتون کے بیان کے مطابق ملزم اس کا دفتری ساتھی تھا، جس نے اسے ساتھ کام پر جانے کی پیشکش کی تھی، تاہم راستے میں وہ اسے کسی اور مقام پر لے جانے کی کوشش کر رہا تھا۔ خاتون کا کہنا ہے کہ گروپ کیپٹن عاصم طارق نے بروقت مداخلت کرکے اس کی جان بچائی۔

قانون نافذ کرنے والے اداروں نے ملزم کی گرفتاری کے لیے مختلف مقامات پر کارروائیاں شروع کر دی ہیں اور واقعے کی مزید تحقیقات جاری ہیں۔

شہید گروپ کیپٹن عاصم طارق اپنے سوگواران میں بیوہ، ایک بیٹی اور ایک بیٹا چھوڑ گئے ہیں۔

دوسری جانب وفاقی وزیر داخلہ محسن نقوی نے خاتون کو بچاتے ہوئے گروپ کیپٹن عاصم طارق کی شہادت پر گہرے دکھ اور افسوس کا اظہار کیا ہے۔ انہوں نے شہید کے اہل خانہ سے دلی تعزیت کرتے ہوئے کہا کہ ان کی قربانی ہمیشہ یاد رکھی جائے گی۔

وزیر داخلہ نے آئی جی اسلام آباد پولیس سے واقعے کی فوری رپورٹ طلب کرتے ہوئے ہدایت کی ہے کہ فائرنگ میں ملوث ملزم کو جلد از جلد گرفتار کیا جائے اور شہید کے لواحقین کو انصاف کی فراہمی یقینی بنائی جائے۔