پنکی کیس میں اہم شخصیات کے نام سامنے آنے کا امکان، آئی جی سندھ جاوید عالم اوڈھو

(کراچی) کراچی چیمبر آف کامرس کے دورے کے موقع پر تاجروں سے گفتگو کرتے ہوئے آئی جی سندھ نے کہا کہ حکومت سندھ کے تعاون سے منشیات کے خاتمے کے لیے بھرپور اقدامات کیے جا رہے ہیں اور اب تک ایک ہزار سے زائد جرائم پیشہ افراد کو گرفتار کیا جا چکا ہے۔

انہوں نے کہا کہ منشیات استعمال کرنے والوں اور اس کاروبار میں ملوث عناصر میں فرق ہے، تاہم جو لوگ منشیات فروشی کے دھندے میں ملوث ہیں انہیں کسی صورت نہیں بخشا جائے گا۔ ان کا کہنا تھا کہ اس مقصد کے لیے خصوصی ٹاسک فورس قائم کی جا رہی ہے اور ہر شہری کی ذمہ داری ہے کہ وہ پولیس کو معلومات فراہم کرے۔

پنکی کیس کے حوالے سے گفتگو کرتے ہوئے جاوید عالم اوڈھو نے بتایا کہ انمول عرف پنکی زیادہ تر لاہور میں رہائش پذیر تھی اور اس کیس میں کئی معتبر نام شامل ہیں، مزید افراد کے نام بھی سامنے آسکتے ہیں۔

آئی جی سندھ نے میڈیا سے اپیل کرتے ہوئے کہا کہ پنکی کو غیر ضروری طور پر گلیمرائز نہ کیا جائے، کہیں ایسا نہ ہو کہ اس معاملے پر فلمیں بننا شروع ہو جائیں۔

انہوں نے مزید کہا کہ سندھ کے کچے کے علاقوں میں “آپریشن نجات مہران” جاری ہے، جس کے دوران 600 سے زائد ڈاکو یا تو مارے گئے، گرفتار ہوئے یا انہوں نے ہتھیار ڈال دیے۔

جاوید عالم اوڈھو کے مطابق اب سندھ میں کوئی بھی نو گو ایریا موجود نہیں جبکہ کراچی میں بھی امن و امان کی صورتحال ماضی کے مقابلے میں کافی بہتر ہو چکی ہے۔