اڈیالہ جیل میں عمران خان اور بشریٰ بی بی کی ملاقات، بہنوں اور وکلا کو رسائی نہ مل سکی

(راولپنڈی) اڈیالہ جیل میں بانی پاکستان تحریک انصاف عمران خان اور ان کی اہلیہ بشریٰ بی بی کے درمیان ہفتہ وار ملاقات کرائی گئی، جو تقریباً 40 منٹ تک جاری رہی۔

جیل ذرائع کے مطابق ملاقات جیل کے کانفرنس روم میں ہوئی، جہاں دونوں نے ایک دوسرے کی خیریت دریافت کی اور مختلف امور پر تبادلہ خیال کیا۔ ملاقات جیل حکام کی نگرانی میں جیل قواعد و ضوابط کے مطابق منعقد کی گئی۔

ذرائع کا کہنا ہے کہ ملاقات کے روز بانی پی ٹی آئی سے کسی وکیل یا خاندان کے دیگر افراد کی ملاقات نہ ہو سکی۔ جیل انتظامیہ کی جانب سے سیکیورٹی اور انتظامی اقدامات معمول کے مطابق برقرار رکھے گئے، جس کے باعث دیگر ملاقاتوں کی اجازت نہیں دی گئی۔

دوسری جانب وزیراعلیٰ خیبر پختونخوا سہیل آفریدی کے نامزد نمائندے اور صوبائی حکومت کے بعض عہدیداران بھی اظہارِ یکجہتی کے لیے اڈیالہ جیل پہنچے، تاہم انہیں بھی بانی پی ٹی آئی سے ملاقات کی اجازت نہ مل سکی۔

ادھر بانی پی ٹی آئی کی بہنیں علیمہ خان، نورین نیازی اور عظمیٰ خان بھی جیل پہنچنے کی کوشش کرتی رہیں، لیکن پولیس نے انہیں فیکٹری ناکے سے آگے جانے کی اجازت نہیں دی۔ ذرائع کے مطابق سیکیورٹی وجوہات کی بنیاد پر انہیں جیل تک رسائی سے روک دیا گیا۔

یاد رہے کہ اڈیالہ جیل میں بانی پی ٹی آئی اور بشریٰ بی بی کی ملاقاتیں مقررہ شیڈول اور جیل قوانین کے تحت کرائی جاتی ہیں، جبکہ ملاقاتوں کے دوران سیکیورٹی انتظامات مزید سخت کر دیے جاتے ہیں۔