ایف آئی ایچ پرو ہاکی لیگ: بھارت نے پاکستان کو 1-7 سے شکست دے دی، پاکستان کی مسلسل 15ویں ہار

لندن: ایف آئی ایچ پرو ہاکی لیگ میں روایتی حریف بھارت نے پاکستان کو یکطرفہ مقابلے کے بعد 1-7 سے شکست دے دی، جبکہ یہ پاکستان کی ایونٹ میں مسلسل 15ویں شکست بن گئی۔

لندن میں کھیلے گئے میچ کے آغاز میں پاکستان نے عمدہ کھیل پیش کیا اور پہلے کوارٹر میں ابوبکر کے گول کی بدولت 1-0 کی برتری حاصل کر لی۔

تاہم ابتدائی برتری کے بعد پاکستانی ٹیم اپنی کارکردگی برقرار نہ رکھ سکی اور بھارتی ٹیم نے شاندار واپسی کرتے ہوئے مسلسل سات گول اسکور کیے۔ بھارتی کھلاڑیوں نے جارحانہ کھیل کا مظاہرہ کرتے ہوئے پاکستانی دفاع کو مسلسل دباؤ میں رکھا۔

مقررہ وقت کے اختتام پر بھارت نے 7-1 سے کامیابی حاصل کرتے ہوئے اہم پوائنٹس اپنے نام کر لیے، جبکہ پاکستان کو ایک اور بھاری شکست کا سامنا کرنا پڑا۔

یہ ایف آئی ایچ پرو ہاکی لیگ میں پاکستان کی مسلسل 15ویں شکست ہے، جو ٹیم کی حالیہ کارکردگی پر کئی سوالات کھڑے کر رہی ہے۔

پاکستان اپنا آخری میچ آج انگلینڈ کے خلاف کھیلے گا، جہاں قومی ٹیم ایونٹ کا اختتام بہتر کارکردگی کے ساتھ کرنے کی کوشش کرے گی۔