ڈی ایف ڈبلیو ایئرپورٹ کے واش رومز میں مسلمانوں کے لیے وضو اسٹیشنز نصب کرنے کا منصوبہ

امریکی میڈیا کے مطابق ایئرپورٹ کے ٹرمینل ڈی میں مردوں اور خواتین کے واش رومز میں ایک ایک وضو اسٹیشن قائم کیا جائے گا، جہاں مسلمان مسافر نماز سے قبل وضو کے دوران اپنے پاؤں آسانی سے دھو سکیں گے۔

رپورٹ کے مطابق اس منصوبے پر تقریباً 3 لاکھ ڈالر لاگت آئے گی اور اس کی مکمل فنڈنگ نجی ذرائع سے کی جائے گی۔ منصوبے کی رجسٹریشن 31 جولائی 2026 کو کی گئی جبکہ کام رواں سال کے اختتام تک مکمل ہونے کی توقع ہے۔

ایئرپورٹ انتظامیہ کے مطابق خصوصی وضو اسٹیشنز کا مقصد مسافروں کی سہولت کے ساتھ ساتھ واش رومز میں پانی پھیلنے اور فرش پھسلنے کے مسئلے کو کم کرنا بھی ہے۔ عام واش بیسن میں پاؤں دھونے سے فرش گیلا ہونے اور سنک کو نقصان پہنچنے کے خدشات بھی موجود رہتے ہیں۔

رپورٹ کے مطابق امریکا کے بعض دیگر بڑے ہوائی اڈوں پر بھی مسلمان مسافروں کے لیے وضو کی سہولت پہلے سے موجود ہے۔ ڈی ایف ڈبلیو ایئرپورٹ میں مختلف مقامات پر بین المذاہب عبادت اور روحانی سہولت کے مراکز بھی قائم ہیں۔

یہ اقدام امریکا میں بڑھتے ہوئے بین الاقوامی فضائی سفر کے تناظر میں مختلف مذاہب سے تعلق رکھنے والے مسافروں کی مذہبی ضروریات کو مدنظر رکھتے ہوئے سہولیات فراہم کرنے کی کوشش کے طور پر سامنے آیا ہے۔