امریکی میڈیا کا دعویٰ: ایران نے اردن میں امریکی فوجی اڈوں پر بیلسٹک میزائل داغ دیے، تمام میزائل تباہ کر دیے گئے

واشنگٹن / عمان: امریکی میڈیا نے دعویٰ کیا ہے کہ ایران نے اردن میں قائم امریکی فوجی اڈوں کو نشانہ بناتے ہوئے متعدد بیلسٹک میزائل داغے ہیں، تاہم امریکی فوج کا کہنا ہے کہ تمام میزائل بروقت روک لیے گئے اور کسی قسم کے جانی یا مالی نقصان کی اطلاع نہیں ملی۔

امریکی میڈیا رپورٹس کے مطابق فوجی حکام نے بتایا کہ ایران کے پاسدارانِ انقلاب کی جانب سے مشرق وسطیٰ میں موجود امریکی فوجی تنصیبات کی طرف متعدد بیلسٹک میزائل فائر کیے گئے۔

رپورٹ میں امریکی فوج کے حوالے سے کہا گیا ہے کہ جدید فضائی دفاعی نظام نے تمام آنے والے میزائلوں کو کامیابی سے تباہ کر دیا، جس کے باعث کوئی بھی میزائل اپنے ہدف تک نہ پہنچ سکا۔

امریکی حکام کے مطابق واقعے کے بعد خطے میں موجود تمام امریکی افواج کو ہائی الرٹ کر دیا گیا ہے، جبکہ دفاعی اور نگرانی کے اقدامات مزید سخت کر دیے گئے ہیں۔

دوسری جانب اس واقعے پر ایران کی جانب سے تاحال کوئی باضابطہ ردعمل سامنے نہیں آیا۔ اگر امریکی میڈیا کا دعویٰ درست ثابت ہوتا ہے تو اس پیش رفت سے مشرقِ وسطیٰ میں پہلے سے موجود کشیدگی میں مزید اضافہ ہونے کا خدشہ ظاہر کیا جا رہا ہے۔