جنگ بندی میں توسیع پر غور کیا جائے، اسحاق ڈار کی امریکی ناظم الامور سے گفتگو

(اسلام آباد)اسحاق ڈار نے امریکی ناظم الامور نیٹلی اے بیکر سے ملاقات میں فریقین پر جنگ بندی میں توسیع پر غور کرنے پر زور دیا ہے۔

دفتر خارجہ پاکستان کے ترجمان کی جانب سے جاری بیان کے مطابق نائب وزیراعظم و وزیر خارجہ اسحاق ڈار اور امریکی ناظم الامور کے درمیان ملاقات میں حالیہ علاقائی پیشرفت کا جائزہ لیا گیا۔

ترجمان کے مطابق اسحاق ڈار نے تنازعات کے حل کیلئے مذاکرات اور سفارت کاری کی اہمیت پر زور دیتے ہوئے کہا کہ مذاکرات ہی چیلنجز سے نمٹنے اور دیرپا علاقائی امن و استحکام کا واحد قابل عمل ذریعہ ہیں۔

اسحاق ڈار نے امریکا اور ایران کے درمیان روابط بڑھانے کی ضرورت پر بھی زور دیا اور کہا کہ فریقین جنگ بندی میں توسیع پر غور کریں اور سفارت کاری کو موقع دیا جائے۔

دوسری جانب امریکی ناظم الامور نیٹلی اے بیکر نے علاقائی امن اور مذاکرات کی سہولت فراہم کرنے میں پاکستان کے کردار کو سراہتے ہوئے کہا کہ پاکستان کی سفارتی کوششیں خطے میں استحکام کیلئے اہم ہیں۔

ملاقات میں دونوں فریقین نے خطے میں امن، استحکام اور مذاکرات کے تسلسل کی ضرورت پر اتفاق بھی کیا۔