امریکہ اور ایران کے درمیان معاہدے پر جمعہ کو سوئٹزرلینڈ میں دستخط متوقع

( جنیوا ) سوئٹزرلینڈ کی وزارتِ خارجہ نے اعلان کیا ہے کہ مشرقِ وسطیٰ میں جاری تنازع کے خاتمے کے لیے امریکہ اور ایران کے درمیان طے پانے والے معاہدے پر جمعہ، 19 جون کو سوئٹزرلینڈ کے معروف برگن اسٹاک ریزورٹ میں دستخط کیے جائیں گے

میڈیا رپورٹس کے مطابق تہران اور واشنگٹن نے اتوار کے روز ایک مفاہمتی یادداشت پر اتفاق کیا تھا، جس کا مقصد 28 فروری کو شروع ہونے والے اس تنازع کا خاتمہ ہے جو امریکی اور اسرائیلی حملوں کے بعد پورے مشرقِ وسطیٰ تک پھیل گیا تھا

سوئس وزارتِ خارجہ کے بیان میں کہا گیا کہ دستخطی تقریب کا انعقاد وسطی سوئٹزرلینڈ میں واقع جھیل لوسرن کے قریب پہاڑی مقام برگن اسٹاک میں کیا جائے گا۔ یہ مقام تین اطراف سے پانی میں گھرا ہونے کی وجہ سے سکیورٹی کے اعتبار سے انتہائی محفوظ تصور کیا جاتا ہے

بیان کے مطابق اس مقام کی تجویز پاکستان اور قطر کے ثالثوں نے امریکہ اور ایران کے ساتھ مشاورت سے دی تھی۔ سوئٹزرلینڈ اس پورے عمل میں سہولت کار کا کردار ادا کر رہا ہے اور ملاقات کے انعقاد کے لیے ضروری سفارتی اور انتظامی شرائط فراہم کر رہا ہے

امریکی حکام کے مطابق فریم ورک معاہدے پر امریکی صدر ڈونلڈ ٹرمپ، نائب صدر جے ڈی وینس اور ایران کے نائب وزیر خارجہ محمد باقر قالیباف، جو مذاکرات میں ایران کے مرکزی نمائندے تھے، الیکٹرانک دستخط کر چکے ہیں۔

تاہم معاہدے کا مکمل متن اب تک عوام کے سامنے نہیں لایا گیا، جس کے باعث اس بات پر ابہام برقرار ہے کہ طویل اور مشکل مذاکرات کے دوران کن نکات پر حتمی اتفاق ہوا۔ ذرائع کے مطابق ایران کے جوہری پروگرام، پابندیوں کے خاتمے اور آبنائے ہرمز سے متعلق معاملات پر دونوں ممالک کے درمیان سخت اختلافات موجود تھے۔

امریکی نائب صدر جے ڈی وینس نے سی این این سے گفتگو میں کہا کہ معاہدہ محض ڈیڑھ صفحے پر مشتمل ایک عمومی نوعیت کی دستاویز ہے، جس کی تفصیلات بعد میں جاری کی جائیں گی۔

تجزیہ کاروں کے مطابق اگر یہ معاہدہ طے پا جاتا ہے تو یہ مشرقِ وسطیٰ میں حالیہ کشیدگی کے خاتمے اور امریکہ ایران تعلقات میں ایک اہم پیش رفت ثابت ہو سکتا ہے