اسرائیل نے امریکا سے تل ابیب کے بن گورین ایئرپورٹ سے فوجی طیارے ہٹانے کی درخواست کر دی

(تل ابیب) اسرائیل نے امریکا سے مرکزی بن گورین ایئرپورٹ پر موجود فوجی طیاروں اور ایندھن بردار جہازوں کی تعداد کم کرنے کی درخواست کر دی ہے۔ اسرائیلی میڈیا کے مطابق اسرائیلی حکام نے خدشہ ظاہر کیا ہے کہ موسم گرما کے دوران شہری فضائی آپریشنز متاثر ہو سکتے ہیں، جس کے باعث ایئرپورٹ پر فوجی سرگرمیوں کو محدود کرنے کا مطالبہ کیا گیا ہے۔

رپورٹس کے مطابق اسرائیل نے امریکا سے بن گورین ایئرپورٹ سے ایندھن بردار جہاز ہٹانے کی درخواست کی ہے۔ اسرائیلی میڈیا کا کہنا ہے کہ امریکا پہلے ہی ایئرپورٹ سے 28 ایندھن بردار طیارے منتقل کر چکا ہے، تاہم اسرائیل نے مزید 20 فوجی طیارے بھی ہٹانے کا مطالبہ کیا ہے۔

اسرائیلی حکام کے مطابق امریکی فوجی طیاروں کی بڑی تعداد کے باعث مسافر پروازوں کی آمدورفت متاثر ہونے کا خدشہ پیدا ہو گیا ہے۔ اسی تناظر میں امریکا کو بھیجے گئے پیغام میں شہری ہوابازی کے نظام کو ترجیح دینے پر زور دیا گیا ہے تاکہ گرمیوں کے موسم میں بڑھنے والے فضائی ٹریفک کے دباؤ کو بہتر انداز میں سنبھالا جا سکے۔

رپورٹ کے مطابق اسرائیل نے بن گورین ایئرپورٹ پر موجود امریکی فوجی طیاروں کی تعداد میں مزید کمی کی بھی درخواست کی ہے۔ اس پیش رفت کو خطے میں جاری سیکیورٹی صورتحال اور فضائی آپریشنز کے تناظر میں اہم قرار دیا جا رہا ہے، تاہم امریکی حکام کی جانب سے اس حوالے سے تاحال کوئی باضابطہ ردعمل سامنے نہیں آیا۔