جوز بٹلر نے ٹی ٹوئنٹی کرکٹ کا بڑا ریکارڈ توڑ دیا، پولارڈ کو پیچھے چھوڑ کر نمبر ون بیٹر بن گئے

(لندن)انگلینڈ کے جارح مزاج بیٹر جوز بٹلر نے ٹی ٹوئنٹی کرکٹ کی تاریخ میں سب سے زیادہ رنز بنانے کا اعزاز حاصل کر لیا ہے۔ انہوں نے ویسٹ انڈیز کے سابق آل راؤنڈر کیرون پولارڈ کو پیچھے چھوڑتے ہوئے عالمی ریکارڈ اپنے نام کیا۔

جوز بٹلر نے دی ہنڈرڈ کے میچ میں مانچسٹر سپر جائنٹس کی نمائندگی کرتے ہوئے ویلش فائر کے خلاف شاندار بیٹنگ کا مظاہرہ کیا اور چھکوں کی برسات کرتے ہوئے یہ تاریخی سنگ میل عبور کیا۔

واضح رہے کہ دی ہنڈرڈ فارمیٹ کی اننگز 20 اوورز کے برابر ہوتی ہے، اسی وجہ سے اس میں بنائے گئے رنز کو ٹی ٹوئنٹی ریکارڈز میں شمار کیا جاتا ہے۔

میچ کے بعد گفتگو کرتے ہوئے جوز بٹلر نے کہا کہ انہیں اس کامیابی پر فخر ہے۔ ان کا کہنا تھا کہ ٹی ٹوئنٹی کرکٹ کی تاریخ میں دنیا بھر میں سب سے زیادہ رنز بنانے والا کھلاڑی بننا ایک شاندار لمحہ ہے، تاہم مستقبل میں کوئی نہ کوئی کھلاڑی یہ ریکارڈ توڑ دے گا۔

اعداد و شمار کے مطابق کیرون پولارڈ نے 746 ٹی ٹوئنٹی میچز میں 14 ہزار 803 رنز بنائے تھے، جبکہ جوز بٹلر نے 521 میچز میں 14 ہزار 833 رنز بنا کر انہیں پیچھے چھوڑ دیا۔

ٹی ٹوئنٹی کرکٹ میں سب سے زیادہ رنز بنانے والے کھلاڑیوں کی فہرست میں کرس گیل 14 ہزار 562 رنز کے ساتھ تیسرے نمبر پر ہیں، جبکہ انگلینڈ کے جیمز وینس 14 ہزار 449 رنز کے ساتھ چوتھے نمبر پر موجود ہیں۔

پاکستان کی جانب سے ٹی ٹوئنٹی کرکٹ میں سب سے زیادہ رنز بنانے کا اعزاز شعیب ملک کے پاس ہے، جنہوں نے 557 میچز میں 13 ہزار 571 رنز اسکور کیے ہیں۔