محسن نقوی حکومت کے طاقتور ترین وزیر ہیں، کئی معاملات میں وزیراعظم کو بھی جوابدہ نہیں، خواجہ آصف

اسلام آباد: وفاقی وزیر دفاع خواجہ آصف نے کہا ہے کہ وزیر داخلہ محسن نقوی موجودہ حکومت کے طاقتور ترین وزیر ہیں اور کئی معاملات میں وہ وزیراعظم کو بھی جوابدہ نہیں ہیں۔

نجی ٹی وی کو دیے گئے انٹرویو میں خواجہ آصف نے کہا کہ محسن نقوی وزیر داخلہ ہونے کے باوجود حکومتی نظام کا روایتی حصہ دکھائی نہیں دیتے۔ ان کے بقول انہوں نے محسن نقوی کو کابینہ کے اجلاسوں میں صرف دو یا تین مرتبہ ہی دیکھا ہے۔

وزیر دفاع نے مزید کہا کہ محسن نقوی پارلیمنٹ میں بھی بہت کم آئے ہیں اور ان کے خیال میں وہ صرف سات یا آٹھ بار ہی ایوان میں موجود رہے ہوں گے۔

خواجہ آصف نے کہا کہ اگر محسن نقوی موجودہ نظام سے متعلق شکایات کر رہے ہیں تو پھر حکومت کو اپنی کارکردگی کا سنجیدگی سے جائزہ لینا چاہیے۔ انہوں نے طنزیہ انداز میں کہا، "اگر محسن نقوی شکایت کر رہے ہیں تو پھر ہمیں گھر چلے جانا چاہیے۔"

یہ بیان ایسے وقت میں سامنے آیا ہے جب وزیر داخلہ محسن نقوی نے حالیہ گفتگو میں موجودہ انتظامی اور حکومتی نظام پر سوالات اٹھاتے ہوئے کہا تھا کہ اگر یہی صورتحال برقرار رہی تو آئندہ دس برس بعد بھی ملک کو انہی مسائل کا سامنا ہوگا۔

محسن نقوی کا کہنا تھا کہ پاکستان کی ترقی اور بہتر طرزِ حکمرانی کے لیے نئے انتظامی یونٹس یا نئے صوبوں کا قیام ناگزیر ہو چکا ہے، کیونکہ ان کے مطابق موجودہ نظام اپنی افادیت کھو چکا ہے اور اس کے ذریعے عوامی مسائل کا مؤثر حل ممکن نہیں رہا۔

خواجہ آصف اور محسن نقوی کے بیانات نے حکومتی حلقوں میں سیاسی بحث کو مزید تیز کر دیا ہے، تاہم اس معاملے پر وزیراعظم ہاؤس یا وفاقی حکومت کی جانب سے تاحال کوئی باضابطہ ردعمل سامنے نہیں آیا ہے۔