لیڈر کی رہائی کے لیے احتجاج کریں مگر اداروں کو نشانہ نہ بنائیں، خواجہ آصف کی پی ٹی آئی کو تنبیہ

(اسلام آباد) وفاقی وزیر دفاع خواجہ آصف نے پاکستان تحریک انصاف (پی ٹی آئی) کو مخاطب کرتے ہوئے کہا ہے کہ وہ اپنے قائد کی رہائی کے لیے پرامن احتجاج ضرور کریں، لیکن ریاستی اداروں کو نشانہ بنانے یا ان کی بے توقیری سے گریز کیا جائے۔

قومی اسمبلی کے اجلاس میں خطاب کرتے ہوئے خواجہ آصف نے کہا کہ جمہوری نظام میں ہر سیاسی جماعت کو احتجاج کا حق حاصل ہے، تاہم اس حق کو استعمال کرتے ہوئے قومی اداروں کی تضحیک یا ریاستی ڈھانچے کو نقصان پہنچانے کی اجازت نہیں دی جا سکتی۔

انہوں نے کہا کہ سابق صدر آصف علی زرداری، سابق وزرائے اعظم نواز شریف اور شہباز شریف، وزیر اعلیٰ پنجاب مریم نواز سمیت کئی سیاسی رہنما مختلف ادوار میں مقدمات اور سزاؤں کا سامنا کر چکے ہیں، لیکن کسی نے بھی ریاستی نظام یا اداروں کو کمزور کرنے کی کوشش نہیں کی۔

وزیر دفاع کا کہنا تھا کہ گزشتہ سوا دو برس سے تحریک انصاف کی تمام سیاسی سرگرمیوں کا محور صرف ایک شخصیت بن چکی ہے، جبکہ پارلیمنٹ میں بھی جماعت اپنا مؤثر کردار ادا کرنے کے بجائے قومی اداروں کو تنقید کا نشانہ بنا رہی ہے، جو مناسب رویہ نہیں۔

آزاد کشمیر کے معاملے پر اظہار خیال کرتے ہوئے خواجہ آصف نے کہا کہ آزاد کشمیر کی آزادی اور دفاع کے لیے پورے پاکستان نے قربانیاں دی ہیں اور 25 کروڑ پاکستانیوں کے اس خطے کے ساتھ جذباتی اور قومی مفادات وابستہ ہیں۔

انہوں نے مزید کہا کہ لاکھوں کشمیری مہاجرین نے ہجرت کے دوران جانوں کی قربانیاں دی ہیں، اس لیے انہیں ووٹ کے حق سے محروم کرنے کا مطالبہ درست نہیں۔ اگر اس معاملے پر کسی کو اختلاف ہے تو اسے جمہوری طریقے سے انتخابات کے ذریعے عوام کے سامنے رکھا جائے، تاکہ عوام خود فیصلہ کریں۔

خواجہ آصف نے خبردار کیا کہ اگر کوئی قانون کو اپنے ہاتھ میں لینے یا ریاستی نظام کو چیلنج کرنے کی کوشش کرے گا تو ریاست خاموش تماشائی نہیں بن سکتی اور قانون کے مطابق کارروائی عمل میں لائی جائے گی۔