قلات کے قریب سکیورٹی فورسز کی کارروائی، 5 دہشتگرد ہلاک، 23 مغوی بازیاب

قلات: سکیورٹی فورسز نے بلوچستان کے ضلع قلات کے قریب قومی شاہراہ این-25 پر دہشتگردوں کی جانب سے عوامی آمدورفت میں خلل ڈالنے کی کوشش ناکام بناتے ہوئے 5 دہشتگردوں کو ہلاک کر دیا، جبکہ کارروائی کے دوران 23 مغوی افراد کو بحفاظت بازیاب کرا لیا گیا۔

پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے دہشتگردوں کی موجودگی کی اطلاع پر بروقت کارروائی کی۔ کارروائی کے نتیجے میں 5 دہشتگرد مارے گئے جبکہ ان کے ٹھکانے سے 23 مغوی افراد کو بازیاب کرایا گیا۔

آئی ایس پی آر کے جاری بیان کے مطابق دہشتگردوں کے ٹھکانے سے 6 ٹرک، 3 بسیں اور 2 کاریں بھی برآمد کی گئیں۔ سکیورٹی فورسز نے کارروائی کے دوران بڑی تعداد میں اسلحہ، گولہ بارود اور دھماکا خیز مواد بھی قبضے میں لے لیا۔

بیان میں کہا گیا کہ دہشتگردوں نے این-25 پر چیک پوسٹ قائم کر رکھی تھی، جسے مبینہ طور پر اغوا، بھتہ خوری اور گاڑیاں چھیننے کے لیے استعمال کیا جا رہا تھا۔

سکیورٹی فورسز کی کارروائی کے بعد علاقے میں سکیورٹی مزید سخت کر دی گئی ہے، جبکہ واقعے سے متعلق مزید تفصیلات بھی سامنے آنے کا امکان ہے۔