نواز شریف اور مریم نواز کا بڑا فیصلہ، مری اور کوٹلی ستیاں میں نئے سیاحتی منصوبوں کی منظوری

اجلاس میں کوٹلی ستیاں میں سکائی گلاس برج پراجیکٹ کی منظوری دی گئی جبکہ مری میں لینڈ سلائیڈنگ کے مسئلے سے نمٹنے کے لیے عالمی ماہرین کی خدمات حاصل کرنے کا فیصلہ بھی کیا گیا۔ وزیراعلیٰ پنجاب نے چٹا موڑ، دریا گلی، بانسرہ گلی، نمل جھیکا گلی اور دیگر علاقوں میں متاثرین کی بحالی اور امدادی اقدامات تیز کرنے کی ہدایت جاری کی۔

اجلاس میں مری کے مضافاتی علاقوں شوالا، سوزو اور برروری میں تین نئے ہاسپٹیلٹی زون قائم کرنے کی منظوری دی گئی، جہاں نجی شعبے کے اشتراک سے فائیو اسٹار معیار کے ہوٹل تعمیر کیے جائیں گے۔ اس کے علاوہ مری بحالی پراجیکٹ کے لیے ماہرین کی ٹیم تشکیل دینے کا بھی فیصلہ کیا گیا۔

اجلاس میں مری ریچ بل روڈ سمیت دیگر سڑکوں کی دس فٹ توسیع، مری گلاس ٹرین پراجیکٹ کے تعمیراتی کام کا آغاز ایک ماہ میں کرنے کا ہدف بھی مقرر کیا گیا۔ مزید برآں، انگوری روڈ پارک، ایم آئی ٹی پارک اور اریاڑی پارک کے قیام سمیت نئے پارکس کے منصوبوں کا بھی جائزہ لیا گیا۔

بریفنگ میں بتایا گیا کہ بانسرہ گلی میں زولوجیکل گارڈن، ایکو زون، برج کراسنگ اور جدید کانفرنس روم قائم کیے جائیں گے، جبکہ وائلڈ لائف کے تحفظ کے لیے بیئر ہاؤس، ٹائیگر ہاؤس اور برڈ ایویری بھی بنائے جائیں گے۔

اجلاس میں چیوڑاہل پر مری کے پہلے گلیمپنگ پوڈ ویلج، پیراگلائیڈنگ کلب، چیئر لفٹ پراجیکٹ اور دیگر سیاحتی منصوبوں کی منظوری بھی دی گئی۔ علاوہ ازیں، ضلع مری میں دریائے جہلم سے بلک واٹر سپلائی اسکیم کی فزیبلٹی رپورٹ 30 اپریل تک مکمل کرنے کی ہدایت جاری کی گئی۔