ایرانی صدر مسعود پزشکیان کل پاکستان کے دورے پر، اعلیٰ سطحی ملاقاتیں متوقع

(تہران) ایران کے صدر مسعود پزشکیان منگل کو ایک روزہ سرکاری دورے پر پاکستان پہنچیں گے، جہاں وہ پاکستانی قیادت اور اعلیٰ حکام سے اہم ملاقاتیں کریں گے۔

ایران کی سرکاری خبر رساں ایجنسی ارنا کے مطابق صدر مسعود پزشکیان اپنے دورۂ پاکستان کے دوران دوطرفہ تعلقات، اقتصادی تعاون، سرحدی امور اور خطے کی مجموعی صورتحال پر پاکستانی حکام سے تفصیلی بات چیت کریں گے۔

ایرانی صدر کے ترجمان حبیب عباسی نے بتایا ہے کہ یہ دورہ ممکنہ طور پر ایک روز پر مشتمل ہوگا، تاہم ملاقاتوں کے ایجنڈے اور دیگر تفصیلات جلد جاری کیے جانے کا امکان ہے۔

تجزیہ کاروں کے مطابق ایرانی صدر کا دورہ ایسے وقت میں ہو رہا ہے جب دونوں ممالک کے درمیان تجارتی، اقتصادی اور سفارتی روابط کو مزید فروغ دینے کی کوششیں جاری ہیں۔ توقع کی جا رہی ہے کہ اس دورے میں باہمی دلچسپی کے مختلف امور کے علاوہ علاقائی امن و استحکام سے متعلق معاملات بھی زیرِ غور آئیں گے۔

واضح رہے کہ صدر مسعود پزشکیان اس سے قبل اگست 2025 میں بھی پاکستان کا دورہ کر چکے ہیں، جہاں دونوں ممالک نے مختلف شعبوں میں تعاون بڑھانے کے عزم کا اعادہ کیا تھا۔

دورے کو پاکستان اور ایران کے تعلقات میں مزید بہتری اور خطے میں تعاون کے فروغ کے لیے ایک اہم پیش رفت قرار دیا جا رہا ہے۔