پاکستان وائٹ بال ٹیم درست سمت میں مگر ورلڈ کپ جیتنے کے لیے مزید محنت ضروری.مائیک ہیسن

پاکستان وائٹ بال ٹیم کے ہیڈ کوچ مائیک ہیسن نے کہا ہے کہ قومی ٹیم درست سمت میں آگے بڑھ رہی ہے، تاہم عالمی معیار کی ٹیم بننے اور بڑے ٹورنامنٹس میں کامیابی حاصل کرنے کے لیے ابھی کافی کام کرنا باقی ہے۔

اپنے بیان میں مائیک ہیسن نے کہا کہ پاکستان کو جدید وائٹ بال کرکٹ کے تقاضوں کو بہتر انداز میں سمجھنا ہوگا اور بدلتے ہوئے کھیل کے مطابق اپنی حکمت عملی اپنانا ہوگی۔ ان کے مطابق بڑے مقابلوں میں بہتر فیصلے کرنا ہی سب سے بڑی آزمائش ہوتی ہے، کیونکہ اہم مواقع پر درست فیصلہ ہی کامیابی اور ناکامی کے درمیان فرق پیدا کرتا ہے۔

انہوں نے کہا کہ پاکستانی ٹیم آئندہ ورلڈ کپ میں صرف تجربہ حاصل کرنے کے لیے نہیں بلکہ ٹائٹل جیتنے کے واضح عزم کے ساتھ میدان میں اترے گی۔ ان کا کہنا تھا کہ عالمی چیمپئن بننے کے لیے مستقل مزاجی اور ہر شعبے میں بہترین کارکردگی ناگزیر ہے۔

ہیڈ کوچ نے اس بات پر بھی زور دیا کہ جدید ٹی ٹوئنٹی کرکٹ میں ٹیم کی بیٹنگ لائن کا آٹھویں اور نویں نمبر تک مضبوط ہونا ضروری ہے، تاکہ کسی بھی صورتحال میں جارحانہ انداز برقرار رکھا جا سکے اور ٹیم بڑے ہدف کے تعاقب یا دفاع دونوں میں مؤثر ثابت ہو۔

مائیک ہیسن کے مطابق اگر قومی ٹیم جدید کرکٹ کے تقاضوں کے مطابق اپنی منصوبہ بندی اور فیصلہ سازی میں بہتری لاتی رہی تو مستقبل میں عالمی سطح پر بڑی کامیابیاں حاصل کرنے کی بھرپور صلاحیت رکھتی ہے۔