مجتبیٰ خامنہ ای صحت یاب ہو رہے ہیں، امریکی میڈیا کا دعویٰ

امریکی میڈیا نے دعویٰ کیا ہے کہ ایران کے سپریم لیڈرمجتبیٰ خامنہ ای فضائی حملے میں زخمی ہونے کے بعد صحت یابی کے مرحلے میں ہیں۔

امریکی نشریاتی ادارےسی این این نے انٹیلی جنس ذرائع کے حوالے سے رپورٹ کیا ہے کہ مجتبیٰ خامنہ ای حملے کے بعد سے منظرِ عام پر نہیں آئے اور ان کی سکیورٹی غیر معمولی طور پر سخت کر دی گئی ہے۔

رپورٹ کے مطابق حملے کے دوران مجتبیٰ خامنہ ای کے چہرے اور ٹانگوں پر شدید چوٹیں آئیں، جس کے بعد انہیں انتہائی محدود اور محفوظ مقام پر منتقل کیا گیا۔

سی این این کے مطابق سکیورٹی خدشات کے باعث مجتبیٰ خامنہ ای اس وقت الیکٹرانک میڈیا یا ڈیجیٹل ذرائع استعمال نہیں کر رہے بلکہ اپنے پیغامات قاصدوں کے ذریعے متعلقہ حکام تک پہنچا رہے ہیں۔

رپورٹ میں مزید کہا گیا ہے کہ ایرانی قیادت نے ان کی نقل و حرکت اور رابطوں کو خفیہ رکھا ہوا ہے، جبکہ حکام کی جانب سے اس حوالے سے باضابطہ طور پر کوئی تفصیلی بیان جاری نہیں کیا گیا۔

خطے میں جاری کشیدگی اور ایران سے متعلق سکیورٹی صورتحال کے باعث عالمی مبصرین ان خبروں پر گہری نظر رکھے ہوئے ہیں۔