نیتن یاہو کا اماراتی صدر سے رابطہ، ایرانی حملوں کی مذمت اور مکمل یکجہتی کا اظہار

(ابوظہبی) اسرائیلی وزیراعظم بنیامین نیتن یاہو اور متحدہ عرب امارات کے صدر شیخ محمد بن زاید النہیان کے درمیان ٹیلیفونک رابطہ ہوا ہے، جس میں خطے کی تازہ صورتحال اور حالیہ ایرانی حملوں پر تبادلہ خیال کیا گیا۔

عرب میڈیا رپورٹس کے مطابق نیتن یاہو نے گفتگو کے دوران ایرانی حملوں کی مذمت کرتے ہوئے متحدہ عرب امارات کے ساتھ مکمل یکجہتی کا اظہار کیا۔

اسرائیل کے عربی زبان کے سرکاری ایکس اکاؤنٹ پر جاری بیان میں کہا گیا کہ اسرائیلی وزیراعظم نے ایرانی حملوں کو متحدہ عرب امارات کی خودمختاری کی کھلی خلاف ورزی اور علاقائی استحکام کے لیے خطرہ قرار دیا۔

بیان کے مطابق اسرائیل نے امارات کی سلامتی اور استحکام کے لیے کیے جانے والے تمام اقدامات کی مکمل حمایت کا اعادہ بھی کیا۔

رپورٹس کے مطابق دونوں رہنماؤں نے خطے میں بڑھتی ہوئی کشیدگی اور سلامتی کی صورتحال پر بھی گفتگو کی، جبکہ سفارتی رابطوں کو جاری رکھنے پر اتفاق کیا گیا۔

تجزیہ کاروں کے مطابق اسرائیل اور متحدہ عرب امارات کے درمیان حالیہ برسوں میں قائم ہونے والے تعلقات خطے میں سیکیورٹی اور دفاعی تعاون کو مزید مضبوط بنا رہے ہیں، خصوصاً ایسے وقت میں جب ایران اور مغربی اتحادیوں کے درمیان کشیدگی میں اضافہ دیکھا جا رہا ہے۔