واشنگٹن میں پاکستان کا 79واں یومِ آزادی، سفیر رضوان سعید شیخ کا قومی اتحاد اور معاشی ترقی پر زور

واشنگٹن ڈی سی میں سفارتخانہ پاکستان میں ملک کے 79ویں یومِ آزادی کے موقع پر سادہ و پروقار پرچم کشائی کی تقریب منعقد ہوئی۔ سفیر پاکستان رضوان سعید شیخ نے پاکستانی امریکی کمیونٹی، سفارتخانے کے افسران اور میڈیا نمائندگان کی موجودگی میں قومی ترانے کی دھن پر پرچم لہرایا۔

تقریب میں صدرِ پاکستان، وزیراعظم اور نائب وزیراعظم و وزیر خارجہ کے یومِ آزادی کے خصوصی پیغامات بھی پڑھ کر سنائے گئے، جبکہ قائداعظم محمد علی جناح کی 150ویں سالگرہ کے حوالے سے قائداعظم کے مجسمے کی نقاب کشائی بھی کی گئی۔

اپنے خطاب میں سفیر رضوان سعید شیخ نے کہا کہ پاکستان اہم ہے اور ہمیشہ اہم رہے گا۔ انہوں نے کہا کہ پاکستان اور امریکہ کے دیرینہ تعلقات کو اقتصادی تعاون، باہمی سرمایہ کاری، تجارت اور تعلیم کے شعبوں میں مزید مضبوط کرنے کی ضرورت ہے۔

سفیر پاکستان نے کہا کہ پاکستان نے ماضی میں امریکہ اور چین کے درمیان فاصلے کم کرنے میں کردار ادا کیا اور اب امریکہ اور ایران کے درمیان کشیدگی کم کرنے کے لیے ثالثی کر رہا ہے۔ انہوں نے کہا کہ پاکستان کی کامیاب سفارت کاری کی تاریخ آٹھ دہائیوں پر محیط ہے۔

تقریب میں قائد اعظم محمد علی جناح کے مجسمے کی نقاب کشائی میں کی گئی، جبکہ پاکستان کی سلامتی اور خوشحالی کے لیے خصوصی دعا بھی کی گئی۔