واشنگٹن میں پاکستانی ثقافت کے رنگ بکھر گئے، “پاسپورٹ ڈی سی” میں ہزاروں افراد کی شرکت

واشنگٹن ڈی سی (خصوصی رپورٹ) بین الاقوامی ثقافتوں کے اس بڑے جشن میں واشنگٹن میں قائم 68 ممالک کے سفارت خانوں نے اپنے دروازے عوام کے لیے کھولے، تاہم پاکستانی سفارت خانہ اپنی رنگا رنگ ثقافتی سرگرمیوں، روایتی مہمان نوازی اور منفرد پیشکشوں کے باعث خصوصی توجہ کا مرکز بنا رہا۔

سفارت خانہ پاکستان کی جانب سے ملک کی خوبصورتی، تاریخی ورثے، فنون لطیفہ اور متنوع ثقافت کو اجاگر کرنے کے لیے خصوصی نمائشوں کا اہتمام کیا گیا۔ تقریب میں امریکہ کے 250 ویں یوم آزادی کی مناسبت سے خصوصی سجاوٹ کی گئی جبکہ پاک امریکہ دوستی کی جھلکیاں بھی نمایاں طور پر پیش کی گئیں۔

ایونٹ میں عالمی شہرت یافتہ پاکستانی ٹرک آرٹ، روایتی ملبوسات، دستکاری کے شاہکار اور ثقافتی فن پارے شرکاء کی توجہ کا مرکز بنے رہے۔ مختلف اسٹالز پر خوشبوؤں، قیمتی پتھروں، زیورات اور پاکستانی ثقافت کی نمائندگی کرنے والی اشیاء کو پیش کیا گیا۔

پاکستانی کھانوں اور روایتی ذائقوں نے غیر ملکی مہمانوں کے دل جیت لیے جبکہ بریانی، کباب، سموسے اور دیگر روایتی پکوانوں کو شرکاء نے بے حد پسند کیا۔

تقریب میں اردو خطاطی اور مہندی کے اسٹالز پر غیر ملکی مہمانوں کا غیر معمولی رش دیکھنے میں آیا اور شرکاء نے پاکستانی ثقافت میں گہری دلچسپی کا اظہار کیا۔

اس موقع پر طبلہ، ہارمونیم، بانسری اور ڈھول کی دلکش دھنوں نے حاضرین کو مسحور کیے رکھا اور واشنگٹن میں پاکستانی موسیقی کے رنگ بکھیر دیے۔ لوک موسیقی اور ثقافتی فن پاروں کے ذریعے مہمانوں کو پاکستان کی روح، روایات اور رنگا رنگ تہذیب سے روشناس کرایا گیا۔

سفارت خانے میں پاکستان کی سیاحتی خوبصورتی، معاشی صلاحیت اور سرمایہ کاری کے مواقع پر مبنی دستاویزی فلموں کی نمائش بھی کی گئی، جسے شرکاء نے بھرپور دلچسپی سے دیکھا۔

شرکاء کا کہنا تھا کہ پاکستانی سفارت خانے کا دورہ ان کے لیے رنگوں، موسیقی، ذائقوں اور روایتی مہمان نوازی سے بھرپور ایک یادگار ثقافتی سفر ثابت ہوا۔