پٹرول اور ڈیزل کی قیمتوں میں پہلے ہی بڑی کمی کی جا چکی ہے، وزیر پیٹرولیم

(اسلام آباد) وفاقی وزیر پیٹرولیم علی پرویز ملک نے کہا ہے کہ حکومت عوام کو زیادہ سے زیادہ ریلیف فراہم کرنے کے لیے پُرعزم ہے اور پٹرولیم مصنوعات کی قیمتوں میں پہلے ہی نمایاں کمی کی جا چکی ہے۔

اپنے بیان میں وفاقی وزیر نے کہا کہ وزیراعظم شہباز شریف کے وژن کے تحت اب تک ہائی اسپیڈ ڈیزل کی قیمت میں مجموعی طور پر 200 روپے فی لیٹر جبکہ پٹرول کی قیمت میں 155 روپے فی لیٹر کمی کی جا چکی ہے، جس کا مقصد عوام پر مہنگائی کے بوجھ کو کم کرنا ہے۔

علی پرویز ملک کا کہنا تھا کہ حکومت نہ کسی ایک شعبے کو ترجیح دے رہی ہے اور نہ ہی کسی دوسرے شعبے پر غیر ضروری بوجھ ڈال رہی ہے، بلکہ بین الاقوامی ذمہ داریوں اور ملکی معاشی حالات کو مدنظر رکھتے ہوئے صارفین تک ہر ممکن ریلیف پہنچانے کے لیے اقدامات کیے جا رہے ہیں۔

انہوں نے کہا کہ پٹرولیم مصنوعات کی قیمتوں کا تعین عالمی منڈی کے رجحانات، درآمدی لاگت اور ملکی اقتصادی صورتحال کو سامنے رکھ کر کیا جاتا ہے تاکہ جہاں ممکن ہو عوام کو زیادہ سے زیادہ فائدہ پہنچایا جا سکے۔

وفاقی وزیر کے مطابق رواں ہفتے عالمی منڈی میں پٹرول کی پلیٹس قیمت 91.68 سے 98.35 ڈالر فی بیرل جبکہ ہائی اسپیڈ ڈیزل کی پلیٹس قیمت 104.79 سے 109.09 ڈالر فی بیرل کے درمیان رہی۔

انہوں نے مزید کہا کہ حکومت آئندہ بھی عالمی قیمتوں، مالی گنجائش اور قومی مفاد کو مدنظر رکھتے ہوئے عوامی مفاد میں فیصلے کرتی رہے گی اور عوام کو ہر ممکن ریلیف فراہم کرنے کی پالیسی پر عمل جاری رکھا جائے گا۔