وزیراعظم شہباز شریف نے مکہ مکرمہ میں عمرہ ادا کیا، سعودی ولی عہد محمد بن سلمان سے آج اہم ملاقات متوقع

مکہ مکرمہ: وزیراعظم شہباز شریف نے اپنے سرکاری دورۂ سعودی عرب کے دوران مکہ مکرمہ میں عمرہ ادا کیا۔ اس موقع پر وزیراعظم کے ہمراہ نائب وزیراعظم و وزیر خارجہ اسحاق ڈار، فیلڈ مارشل سید عاصم منیر، وفاقی وزیر دفاع خواجہ آصف، وفاقی وزیر اطلاعات و نشریات عطا تارڑ سمیت اعلیٰ سطح کا پاکستانی وفد بھی موجود تھا۔

عمرہ کی ادائیگی سے قبل پاکستانی وفد نے خانہ کعبہ کی زیارت کی سعادت حاصل کی اور پاکستان کی ترقی، خوشحالی، استحکام اور عوام کی سلامتی کے لیے خصوصی دعائیں مانگیں۔

اس سے قبل وزیراعظم شہباز شریف کی جدہ آمد پر نائب گورنر جدہ شہزادہ سعود بن مشال نے ان کا پرتپاک استقبال کیا۔ پاکستانی وفد کے اعزاز میں استقبالیہ بھی دیا گیا۔

وزیراعظم شہباز شریف اپنے دورے کے دوران سعودی ولی عہد اور وزیراعظم شہزادہ محمد بن سلمان سے اہم ملاقات کریں گے، جس میں پاکستان اور سعودی عرب کے درمیان دیرینہ برادرانہ تعلقات، دوطرفہ تعاون، اقتصادی شراکت داری، سرمایہ کاری اور باہمی دلچسپی کے علاقائی و بین الاقوامی امور پر تبادلہ خیال کیا جائے گا۔

حکومتی ذرائع کے مطابق اس ملاقات میں دونوں ممالک کے درمیان مختلف شعبوں میں تعاون کو مزید وسعت دینے اور مشترکہ منصوبوں کو آگے بڑھانے پر بھی گفتگو متوقع ہے۔