سندھ میں 5 کمپنیوں کے آئی وی ڈرپ سیٹس غیر معیاری قرار، ڈرگ ٹیسٹنگ لیبارٹری کی رپورٹ جاری

کراچی: سندھ میں ایچ آئی وی کے پھیلاؤ سے متعلق خدشات کے تناظر میں اہم پیش رفت سامنے آئی ہے، جہاں سندھ ڈرگ ٹیسٹنگ لیبارٹری نے پانچ مختلف کمپنیوں کے آئی وی انفیوژن (ڈرپ) سیٹس کو غیر معیاری قرار دے دیا ہے۔

ڈائریکٹر سندھ ڈرگ ٹیسٹنگ لیبارٹری عدنان رضوی کے مطابق مختلف مقامات سے حاصل کیے گئے آئی وی انفیوژن سیٹس کے نمونے لیبارٹری ٹیسٹ میں مطلوبہ معیار پر پورا نہیں اتر سکے۔ رپورٹ میں بتایا گیا ہے کہ پانچوں ڈرپ سیٹس کی ٹیوب کی لمبائی مقررہ معیار کے مطابق نہیں تھی، جبکہ ان کی تیاری میں استعمال ہونے والا میٹریل بھی غیر معیاری پایا گیا۔

انہوں نے بتایا کہ نوشہرو فیروز اور کراچی کے علاقے ملیر سے حاصل کیے گئے ڈرپ سیٹس کے نمونوں کو میڈیکل ڈیوائس رولز 2017 کے تحت سب اسٹینڈرڈ قرار دیا گیا ہے۔

ڈائریکٹر لیبارٹری کے مطابق غیر معیاری طبی سامان کی موجودگی نے انفیکشن کی روک تھام اور طبی حفاظتی معیار سے متعلق نئے سوالات کو جنم دیا ہے، جس کے پیش نظر متعلقہ حکام کو رپورٹ ارسال کر دی گئی ہے۔

سندھ ڈرگ ٹیسٹنگ لیبارٹری نے اپنی ٹیسٹ رپورٹ متعلقہ ڈرگ انسپکٹرز کو کارروائی کے لیے بھجوا دی ہے، جبکہ سیکریٹری کوالٹی کنٹرول بورڈ سندھ کو بھی نتائج سے آگاہ کر دیا گیا ہے۔ اب متعلقہ اداروں کی جانب سے رپورٹ کی روشنی میں مزید قانونی اور انتظامی اقدامات کیے جانے کا امکان ہے۔