سعودی عرب سے پاکستان کو 2 ارب ڈالر موصول، اسٹیٹ بینک کی تصدیق، زرمبادلہ ذخائر میں اضافہ

(اسلام آباد)پاکستان کو سعودی عرب کی جانب سے 2 ارب ڈالر کی مالی معاونت موصول ہوگئی ہے، اسٹیٹ بینک آف پاکستان نے سعودی وزارت خزانہ سے فنڈز ملنے کی تصدیق کر دی ہے، جس سے ملکی زرمبادلہ ذخائر کو سہارا ملنے کی توقع ہے۔

اسٹیٹ بینک آف پاکستان کے مطابق سعودی عرب کی وزارت خزانہ کی جانب سے 2 ارب ڈالر کی رقم موصول ہو گئی ہے۔ یہ مالی معاونت ایسے وقت میں سامنے آئی ہے جب پاکستان کو بیرونی ادائیگیوں اور زرمبادلہ کے ذخائر کو مستحکم کرنے کی ضرورت درپیش ہے۔

مرکزی بینک کا کہنا ہے کہ اس رقم کے موصول ہونے سے ملکی زرِمبادلہ کے ذخائر میں اضافہ ہوگا اور معیشت کو استحکام ملنے میں مدد ملے گی۔ حکام کے مطابق سعودی عرب کی جانب سے یہ مالی تعاون موجودہ معاشی صورتحال میں پاکستان کے لیے انتہائی اہمیت کا حامل ہے۔

معاشی ماہرین کے مطابق اس امداد سے نہ صرف روپے پر دباؤ میں کمی آئے گی بلکہ عالمی مالیاتی اداروں کے ساتھ مذاکرات میں بھی پاکستان کی پوزیشن بہتر ہو سکتی ہے۔

حکام کا مزید کہنا ہے کہ سعودی عرب کی جانب سے مسلسل مالی معاونت دونوں ممالک کے مضبوط اقتصادی تعلقات کا مظہر ہے اور اس سے پاکستان کی معاشی بحالی کی کوششوں کو تقویت ملے گی۔