کے پی حکومت اور وزیر اعلیٰ کے ساتھ امتیازی سلوک ہو رہا ہے، شفیع اللہ جان

(راولپنڈی) ترجمان خیبرپختونخوا حکومت شفیع اللہ جان نے الزام عائد کیا ہے کہ صوبے اور وزیراعلیٰ سہیل آفریدی کے ساتھ امتیازی سلوک کیا جا رہا ہے اور خیبرپختونخوا کو اس کا مالی حق نہیں دیا جا رہا۔

اڈیالہ روڈ فیکٹری ناکے پر میڈیا سے گفتگو کرتے ہوئے شفیع اللہ جان نے کہا کہ خیبرپختونخوا کو این ایف سی اور این ایچ پی کا حصہ نہیں مل رہا جبکہ پنجاب کیلئے خزانے کا منہ کھولا گیا ہے۔ انہوں نے مطالبہ کیا کہ صوبے کو اس کے آئینی حقوق فوری طور پر فراہم کیے جائیں۔

انہوں نے کہا کہ وزیراعلیٰ سہیل آفریدی ساڑھے چار کروڑ آبادی والے صوبے کے سربراہ ہیں، تاہم عدالتی حکم کے باوجود انہیں بانی سے ملاقات کی اجازت نہیں دی جا رہی۔ ان کے مطابق وزیراعلیٰ اب تک 11 مرتبہ ملاقات کیلئے آ چکے ہیں لیکن ملاقات نہیں کروائی گئی۔

شفیع اللہ جان نے کہا کہ خیبرپختونخوا حکومت اور وزیراعلیٰ کے ساتھ امتیازی سلوک کے خلاف کارکن سراپا احتجاج ہیں۔ انہوں نے کہا کہ حکومت کسی محاذ آرائی کی خواہاں نہیں، تاہم اپنے مینڈیٹ کے تحفظ کیلئے لانگ مارچ بھی کیا جا سکتا ہے۔

ترجمان کے پی حکومت نے مزید بتایا کہ پشاور میں "رہائی فورس" کا باقاعدہ افتتاح کر دیا گیا ہے اور اب تک 50 ہزار سے زائد افراد اس کے رکن بن چکے ہیں۔