عالمی امن کیلئے اہم موقع، فیلڈ مارشل عاصم منیر نے معاہدے میں کلیدی کردار ادا کیا: شہباز شریف

(برگن اسٹاک) وزیراعظم پاکستان شہباز شریف نے کہا ہے کہ موجودہ سفارتی پیش رفت عالمی امن اور استحکام کے لیے ایک اہم موقع ہے اور دنیا کے رہنما مشترکہ کوششوں سے اتحاد، امن اور خوشحالی کو فروغ دے سکتے ہیں۔

سوئٹزرلینڈ کے شہر برگن اسٹاک میں امریکا اور ایران کے درمیان جاری امن مذاکرات کے سیشن کے بعد گفتگو کرتے ہوئے وزیراعظم شہباز شریف نے کہا کہ امریکی صدر ڈونلڈ ٹرمپ کی مدبرانہ قیادت کے باعث دونوں ممالک کے درمیان مذاکرات ممکن ہوئے اور اب دنیا مثبت نتائج کی منتظر ہے۔

وزیراعظم نے کہا کہ امریکی نائب صدر جے ڈی وینس نے بھی مذاکراتی عمل میں فعال اور تعمیری کردار ادا کیا، جس سے فریقین کے درمیان اعتماد سازی اور بات چیت کے فروغ میں مدد ملی۔ انہوں نے امید ظاہر کی کہ یہ مذاکرات خطے اور دنیا میں امن و استحکام کے لیے مثبت نتائج لائیں گے۔

شہباز شریف نے کہا کہ براہ راست مذاکرات کے فروغ اور سفارتی حل کی حمایت پر صدر ٹرمپ کے وژن کو سراہتے ہیں۔ ان کے مطابق موجودہ حالات عالمی برادری کے لیے ایک سنہری موقع ہیں کہ اختلافات کو مذاکرات کے ذریعے حل کیا جائے۔

وزیراعظم نے اس موقع پر فیلڈ مارشل سید عاصم منیر کی خدمات کو بھی خراج تحسین پیش کرتے ہوئے کہا کہ انہوں نے مذاکراتی عمل کو کامیاب بنانے اور مختلف فریقین کے درمیان رابطوں کے فروغ میں اہم کردار ادا کیا ہے۔

دوسری جانب امریکی نائب صدر جے ڈی وینس نے بھی پاکستان کے کردار کو سراہتے ہوئے کہا کہ فیلڈ مارشل سید عاصم منیر ایک بہترین سپہ سالار ہیں جنہوں نے شروع دن سے امن کوششوں میں بھرپور تعاون کیا۔ انہوں نے کہا کہ پاکستان کے مثبت کردار کو عالمی سطح پر پذیرائی ملی ہے۔

جے ڈی وینس نے مزید کہا کہ وزیراعظم شہباز شریف اور فیلڈ مارشل سید عاصم منیر امریکا کے قریبی شراکت دار ہیں اور پاکستان و امریکا کے دیرینہ تعلقات خطے میں امن اور سکیورٹی کے فروغ کے لیے اہم حیثیت رکھتے ہیں۔

انہوں نے اس عزم کا اظہار کیا کہ امریکا مشرق وسطیٰ میں پائیدار امن کے قیام کے لیے اپنی سفارتی کوششیں جاری رکھے گا جبکہ پاکستان سمیت دیگر شراکت دار ممالک کے ساتھ تعاون کو مزید مضبوط بنایا جائے گا۔