امریکا دنیا بھر میں امید کی کرن ہے، اسے کبھی ناکام نہیں ہونے دیں گے: ڈونلڈ ٹرمپ

امریکی صدر ڈونلڈ ٹرمپ نے امریکا کے یوم آزادی کی مرکزی تقریب سے خطاب کرتے ہوئے کہا ہے کہ امریکا آج دنیا بھر میں امید کی کرن ہے، یہ ایک عظیم ملک ہے اور اسے کبھی ناکام نہیں ہونے دیا جائے گا۔

واشنگٹن میں منعقدہ تقریب سے خطاب کرتے ہوئے ٹرمپ نے کہا کہ یوم آزادی کی تقریبات میں شرکت کے لیے ڈیڑھ لاکھ سے زائد افراد جمع ہیں، جو امریکی قوم کے اتحاد اور حب الوطنی کا مظہر ہے۔

انہوں نے کہا کہ امریکی عوام ایک پرچم تلے متحد ہیں اور یہی اتحاد ملک کی سب سے بڑی طاقت ہے۔ ان کے بقول امریکی فوج پہلے سے زیادہ مضبوط اور طاقتور ہو چکی ہے، جبکہ امریکا کے بانیوں کا دیا گیا آئین آج بھی قوم کو متحد رکھنے میں اہم کردار ادا کر رہا ہے۔

صدر ٹرمپ نے کہا کہ امریکا نے ہر شعبے میں نمایاں ترقی کی ہے اور ملک میں مکمل مذہبی آزادی موجود ہے۔ انہوں نے اس عزم کا اظہار بھی کیا کہ امریکا کو کبھی ناکام نہیں ہونے دیا جائے گا۔

واضح رہے کہ امریکا میں آج یوم آزادی کی 250 ویں سالگرہ قومی جوش و جذبے کے ساتھ منائی جا رہی ہے۔ اس موقع پر ملک بھر میں سرکاری تقریبات، پریڈز، آتش بازی اور دیگر جشن کی سرگرمیوں کا اہتمام کیا گیا۔

یوم آزادی کے موقع پر امریکی صدر نے عوام کو مبارکباد بھی پیش کی۔ انہوں نے چار سابق امریکی صدور کے ساتھ ایک یادگاری تصویری ڈیزائن شیئر کیا اور اپنی تصویر پر مشتمل خصوصی یادگاری ڈیزائن بھی متعارف کرایا، جبکہ نیویارک سمیت مختلف شہروں میں شاندار آتش بازی کا مظاہرہ کیا گیا۔

پاکستان کی جانب سے بھی عوام، سول اور عسکری قیادت نے امریکی عوام اور حکومت کو یوم آزادی کی مبارکباد دیتے ہوئے نیک خواہشات کا اظہار کیا۔