اقوام متحدہ کا امریکا اور ایران سے کشیدگی کم کرکے مذاکرات بحال کرنے کا مطالبہ

نیویارک: اقوام متحدہ کے سیکریٹری جنرل انتونیو گوتریس نے امریکا اور ایران سے اپیل کی ہے کہ وہ خطے میں بڑھتی ہوئی کشیدگی کو کم کریں اور مذاکرات کا عمل دوبارہ شروع کریں تاکہ مزید تصادم سے بچا جا سکے۔

اقوام متحدہ کے ترجمان سٹیفن دوجارک نے نیوز بریفنگ کے دوران بتایا کہ سیکریٹری جنرل نے تمام متعلقہ فریقوں پر زور دیا ہے کہ وہ زیادہ سے زیادہ تحمل کا مظاہرہ کریں، ایسے اقدامات سے گریز کریں جو مزید کشیدگی کا سبب بن سکتے ہیں، اور فوری طور پر تناؤ میں کمی لانے کے لیے عملی اقدامات کریں۔

انتونیو گوتریس کا کہنا ہے کہ موجودہ صورتحال میں سفارت کاری، مذاکرات اور باہمی رابطے ہی تنازعات کے پائیدار اور پرامن حل کا مؤثر ذریعہ ہیں۔ انہوں نے تمام فریقوں پر زور دیا کہ وہ کشیدگی میں اضافے کے بجائے بات چیت اور سفارتی ذرائع کو ترجیح دیں۔

اقوام متحدہ نے اس عزم کا بھی اعادہ کیا کہ عالمی امن و استحکام کے فروغ اور تنازعات کے پرامن حل کے لیے وہ اپنی سفارتی کوششیں جاری رکھے گا۔