ایران اور امریکہ میں اہم پیشرفت: مذاکرات کی نگرانی کیلئے اعلیٰ سطحی کمیٹی قائم، 60 روزہ روڈ میپ منظور

(برگن سٹاک) پاکستان اور قطر کی ثالثی میں سوئٹزرلینڈ کے شہر برگن سٹاک میں ہونے والے ایران اور امریکہ کے درمیان مذاکرات میں اہم پیشرفت سامنے آئی ہے، جہاں دونوں ممالک نے مذاکراتی عمل کی نگرانی کیلئے ایک اعلیٰ سطحی کمیٹی قائم کرنے پر اتفاق کر لیا ہے۔

پاکستان اور قطر کی جانب سے جاری مشترکہ اعلامیے کے مطابق فریقین نے حتمی معاہدے تک پہنچنے کیلئے 60 روزہ روڈ میپ کی منظوری دے دی ہے، جبکہ تکنیکی سطح کے مذاکرات فوری طور پر شروع کرنے کا فیصلہ بھی کیا گیا ہے۔ اعلامیے میں کہا گیا ہے کہ مذاکرات کا سلسلہ پورا ہفتہ برگن سٹاک میں جاری رہے گا۔

دفتر خارجہ کے مطابق آبنائے ہرمز میں تجارتی جہازوں کی محفوظ آمدورفت یقینی بنانے کیلئے ایک خصوصی رابطہ لائن قائم کرنے پر بھی اتفاق ہوا ہے، جس سے خطے میں تجارتی سرگرمیوں اور عالمی توانائی کی سپلائی کو استحکام ملنے کی توقع ہے

۔

مشترکہ اعلامیے میں مزید بتایا گیا ہے کہ ایران کے جوہری پروگرام، اقتصادی پابندیوں اور نگرانی کے امور پر الگ الگ ورکنگ گروپس تشکیل دیے جائیں گے۔ اس کے علاوہ لبنان میں جنگ بندی پر عملدرآمد یقینی بنانے کیلئے ایک "ڈی کنفلیکشن سیل" قائم کیا جائے گا، جس میں لبنان اور ثالث ممالک کے نمائندے شامل ہوں گے۔

اعلامیے کے مطابق مذاکرات کی نگرانی کیلئے قائم کی جانے والی اعلیٰ سطحی کمیٹی پورے عمل کی نگرانی کرے گی جبکہ چیف مذاکرات کار کمیٹی کو باقاعدگی سے پیش رفت سے آگاہ کریں گے۔ چیف مذاکرات کار جوہری پروگرام، پابندیوں اور تنازعات کے حل سے متعلق مختلف ورکنگ گروپس کی سربراہی بھی کریں گے تاکہ ممکنہ معاہدے پر مؤثر عملدرآمد کو یقینی بنایا جا سکے۔

پاکستان اور قطر نے مشترکہ طور پر ایران اور امریکہ کی سفارتی کوششوں کو سراہتے ہوئے امید ظاہر کی ہے کہ جاری مذاکرات خطے میں پائیدار امن، استحکام اور باہمی اعتماد کے فروغ میں اہم کردار ادا کریں گے۔