جمعہ کو طے شدہ پروگرام کے مطابق برجنسٹاک میں امریکا ایران مذاکرات نہیں ہوں گے، سوئس وزارت خارجہ

امریکا اور ایران کے درمیان سوئٹزرلینڈ میں ہونے والے اہم مذاکرات طے شدہ شیڈول کے مطابق نہیں ہوں گے، اس بات کی تصدیق سوئس وزارت خارجہ نے کر دی ہے۔

سوئس وزارت خارجہ کے مطابق امریکا اور ایران کے درمیان مذاکرات آج سوئٹزرلینڈ کے برگن اسٹاک ریزورٹ میں ہونا تھے، تاہم اب یہ ملاقات مقررہ وقت پر نہیں ہوگی۔ وزارت خارجہ نے شیڈول میں تبدیلی کی تصدیق تو کی ہے لیکن اس حوالے سے مزید تفصیلات فراہم نہیں کیں۔

اس سے قبل سوئس حکام نے اعلان کیا تھا کہ اسلام آباد میں مفاہمت کی یادداشت پر دستخط کے بعد امریکا اور ایران کے درمیان مذاکرات کا سلسلہ سوئٹزرلینڈ کے شہر برگن اسٹاک میں شروع ہوگا۔ ان مذاکرات کا مقصد معاہدے پر عمل درآمد کے طریقہ کار کو حتمی شکل دینا تھا۔

سوئس وزارت خارجہ کے مطابق مذاکرات میں امریکی اور ایرانی مندوبین شرکت کرنے والے تھے جبکہ پاکستان اور قطر کے نمائندے بھی ثالثی کردار کے تحت موجود رہنے والے تھے۔

دریں اثنا ایرانی وزارت خارجہ کے ترجمان اسماعیل بقائی نے کہا ہے کہ سوئٹزرلینڈ کے دورے کے حوالے سے ابھی کوئی حتمی فیصلہ نہیں کیا گیا اور اس بارے میں مشاورت جاری ہے۔

دوسری جانب وائٹ ہاؤس کے ترجمان نے بھی تصدیق کی ہے کہ امریکی نائب صدر جے ڈی وینس آج رات ایران کے ساتھ مذاکرات کے لیے سوئٹزرلینڈ روانہ نہیں ہوں گے۔

قبل ازیں جے ڈی وینس نے ایک پریس کانفرنس میں کہا تھا کہ آئندہ ہونے والے تکنیکی مذاکرات کے منصوبوں کو ابھی حتمی شکل نہیں دی جا سکی، تاہم امریکی وفد جیسے ہی مناسب موقع میسر آئے گا، مذاکرات کے لیے روانگی کے لیے تیار ہوگا۔

وائٹ ہاؤس کے بیان میں مزید کہا گیا کہ بین الاقوامی مذاکرات کی انتظامی اور عملی پیچیدگیاں اکثر غیر متوقع ہوتی ہیں، اسی لیے موجودہ صورتحال میں نائب صدر کا طے شدہ دورہ مؤخر کر دیا گیا ہے۔

امریکی حکام کے مطابق جیسے ہی مذاکرات کے اگلے مرحلے یا نئی تاریخ کے حوالے سے کوئی واضح پیش رفت ہوگی، اس سے میڈیا اور عوام کو آگاہ کیا جائے گا۔

تجزیہ کاروں کے مطابق مذاکرات میں تاخیر خطے کی سفارتی سرگرمیوں پر اثرانداز ہو سکتی ہے، تاہم فریقین کی جانب سے بات چیت جاری رکھنے کے عزم کا اظہار مثبت پیش رفت تصور کیا جا رہا ہے۔