امریکا نے ایرانی بندرگاہوں کی بحری ناکہ بندی ختم کردی، خلیج عرب و عمان میں آمدورفت بحال

(واشنگٹن )امریکا نے ایرانی بندرگاہوں کی بحری ناکہ بندی ختم کرنے کا اعلان کردیا ہے، جبکہ امریکی سنٹرل کمانڈ (سینٹکام) نے بھی اس پیش رفت کی تصدیق کردی ہے۔

سینٹکام کے مطابق امریکی افواج نے صدر ڈونلڈ ٹرمپ کی ہدایت پر عمل کرتے ہوئے ایرانی بندرگاہوں کے گرد قائم بحری ناکہ بندی ختم کردی ہے، جس کے بعد ایرانی بندرگاہوں کی جانب بحری آمدورفت دوبارہ بحال ہوگئی ہے۔

امریکی بیان میں کہا گیا ہے کہ خلیج عرب اور خلیج عمان میں جہازوں کی نقل و حرکت پر عائد تمام پابندیاں ختم کردی گئی ہیں اور امریکی فوج نے ناکہ بندی سے متعلق تمام اقدامات روک دیے ہیں۔

سینٹکام کے مطابق امریکی بحری جہاز خطے میں موجود رہیں گے تاکہ طے شدہ معاہدے پر عملدرآمد کو یقینی بنایا جاسکے۔ امریکی حکام کا کہنا ہے کہ واشنگٹن معاہدے کی تمام شقوں پر مکمل عملدرآمد کے لیے اپنے کردار کو جاری رکھے گا۔

بیان میں مزید کہا گیا ہے کہ پاکستان کی ثالثی میں امریکا اور ایران کے درمیان طے پانے والی اسلام آباد مفاہمتی یادداشت پر عملدرآمد کا آغاز ہوچکا ہے، جس کے تحت دونوں ممالک کے درمیان کشیدگی کم کرنے اور خطے میں استحکام کو فروغ دینے کی کوششیں جاری ہیں۔

تجزیہ کاروں کے مطابق بحری ناکہ بندی کے خاتمے سے خلیجی خطے میں تجارتی سرگرمیوں، توانائی کی ترسیل اور بین الاقوامی بحری تجارت کو مثبت اثرات مرتب ہونے کی توقع ہے۔