روس نے یوکرین کے ایک اور شہر پر قبضے کا دعویٰ، ہر قیمت پر فتح حاصل کریں گے: ولادیمیر پوتن

روس نے دعویٰ کیا ہے کہ اس کی افواج نے یوکرین کے ایک اور شہر کوستیان تینیوپر قبضہ کر لیا ہے، جبکہ روسی صدر ولادیمیر پوتننے کہا ہے کہ روس ہر قیمت پر اس جنگ میں فتح حاصل کرے گا۔

کریملن کے مطابق صدر پوتن نے اعلیٰ فوجی کمانڈروں اور وزارتِ دفاع کے حکام کے ہمراہ ایک فوجی کمانڈ پوسٹ کا دورہ کیا، جہاں انہیں ڈونباس میں روسی فوج کی پیش قدمی اور مذکورہ شہر پر قبضے سے متعلق بریفنگ دی گئی۔

پوتن نے اس موقع پر کہا کہ انہیں یقین ہے کہ روس اپنے تمام جنگی اہداف حاصل کرے گا، تاہم فوجی قیادت کو کارروائیوں کے دوران روسی فوجیوں کی جانوں کے تحفظ کو بھی یقینی بنانا ہوگا۔

روسی صدر نے الزام عائد کیا کہ یوکرین کی حکومت میدانِ جنگ میں اپنی مبینہ کامیابیوں کا تاثر برقرار رکھنے کے لیے تخریبی اور دہشتگردانہ کارروائیوں کا سہارا لے سکتی ہے۔ ان کا کہنا تھا کہ یوکرین کے اقدامات نہ صرف خود اس کے لیے بلکہ اس کے مغربی اتحادیوں کے لیے بھی نقصان دہ ثابت ہو رہے ہیں۔

پوتن نے یورپی ممالک پر بھی تنقید کرتے ہوئے کہا کہ بعض ممالک بظاہر امن کی بات کرتے ہیں، لیکن عملی طور پر جنگ کو طول دینے کی کوشش کر رہے ہیں۔ انہوں نے خبردار کیا کہ اگر مغربی ممالک یوکرین کی جانب سے روسی شہریوں یا شہری تنصیبات پر حملوں کی حمایت کرتے ہیں تو یہ انتہائی خطرناک رجحان ہوگا۔

روسی صدر نے فوج کو ہدایت دی کہ وہ یوکرین کے فوجی صنعتی ڈھانچے اور جنگی صلاحیت کو سہارا دینے والی تنصیبات کو نشانہ بنانے کی کارروائیاں جاری رکھے۔ ان کے مطابق روسی علاقوں پر حملوں میں اضافے کی صورت میں روس مزید وسیع حفاظتی زون قائم کرنے پر مجبور ہوگا۔

انہوں نے یوکرین کے مغربی اتحادیوں کی ممکنہ براہِ راست شمولیت کا بھی جائزہ لینے کی ہدایت دیتے ہوئے کہا کہ مستقبل کے اہم فیصلے اسی بنیاد پر کیے جا سکتے ہیں۔