صدر ڈونلڈ ٹرمپ نے پاکستان کی درخواست پر ایران کے ساتھ جاری جنگ بندی میں توسیع کا اعلان کر دیا

(واشنگٹن)امریکی صدر ڈونلڈ ٹرمپ نے سوشل میڈیا پلیٹ فارم ٹروتھ سوشل پر جاری بیان میں کہا کہ وزیراعظم شہباز شریف اور فیلڈ مارشل عاصم منیر کی درخواست پر ایران کے خلاف حملہ فی الحال مؤخر کیا جا رہا ہے تاکہ ایرانی قیادت اور نمائندے متفقہ تجویز پیش کر سکیں۔

صدر ٹرمپ نے کہا کہ جنگ بندی میں اس وقت تک توسیع برقرار رہے گی جب تک ایران کی جانب سے تجویز پیش نہیں کی جاتی اور مذاکرات کسی نتیجے پر نہیں پہنچ جاتے۔

انہوں نے مزید کہا کہ امریکی فوج کو ہدایت دی گئی ہے کہ ایران کے خلاف ناکہ بندی جاری رکھی جائے اور دیگر تمام معاملات میں مکمل طور پر تیار رہا جائے۔

امریکی صدر کا کہنا تھا کہ ایران کی حکومت اندرونی طور پر شدید تقسیم کا شکار ہے، تاہم مذاکرات کے ذریعے مسئلے کا حل ممکن ہے۔

اس سے قبل امریکی ٹی وی کو دیے گئے انٹرویو میں صدر ٹرمپ نے کہا تھا کہ ایران کا معاملہ ایک بڑی ڈیل کے ذریعے حل ہو جائے گا۔ ان کا کہنا تھا کہ جب دونوں فریقین مذاکرات کی میز پر بیٹھیں گے تو معاہدہ ہو جائے گا۔

ڈونلڈ ٹرمپ نے مزید کہا کہ امریکی نائب صدر جے ڈی وینس اور دیگر امریکی حکام مذاکرات کیلئے پاکستان کا دورہ کریں گے۔ انہوں نے کہا کہ ایران موجودہ صورتحال میں معاہدہ کرنے پر مجبور ہوگا۔

امریکی صدر نے مذاکرات سے قبل ایرانی قیادت سے خواتین کی رہائی کا مطالبہ بھی کیا ہے۔