کراچی میں موسلا دھار بارش، سڑکیں زیرِ آب، مختلف حادثات میں 4 افراد جاں بحق،

کراچی کے مختلف علاقوں میں صبح ہونے والی موسلا دھار بارش کے بعد وقفے وقفے سے بارش کا سلسلہ جاری ہے، جس کے باعث شہر کے مختلف حصے زیرِ آب آگئے جبکہ مختلف حادثات میں اب تک 4 افراد جاں بحق اور کم از کم 3 زخمی ہو گئے ہیں۔ صورتحال کے پیش نظر شہر میں رین ایمرجنسی نافذ کر دی گئی ہے۔

شدید بارش کے باعث گلیوں، محلوں اور مرکزی شاہراہوں پر پانی جمع ہونے سے شہریوں کو شدید مشکلات کا سامنا ہے جبکہ کئی مقامات پر ٹریفک کی روانی بھی متاثر ہوئی ہے۔ صبح کے وقت ہونے والی طوفانی بارش کے بعد شارعِ فیصل پر نرسری کا مقام تالاب کا منظر پیش کرنے لگا جہاں گاڑیوں کی لمبی قطاروں کے باعث ٹریفک جام ہو گیا۔

بارش کے باعث شہر کی متعدد عمارتوں کے بیسمنٹ پانی سے بھر گئے جبکہ مختلف علاقوں میں سڑکوں کے دھنسنے کی اطلاعات بھی موصول ہوئی ہیں، جس کے نتیجے میں گاڑیوں اور موٹر سائیکل سواروں کو مشکلات کا سامنا کرنا پڑ رہا ہے۔

انتظامیہ کے مطابق کمشنر کراچی کے کنٹرول روم اور متعلقہ افسران نے تمام ڈپٹی کمشنرز کو الرٹ رہنے اور فیلڈ میں متحرک رہنے کی ہدایات جاری کر دی ہیں۔ شہری کسی بھی ہنگامی صورتحال میں مدد یا شکایت کے لیے ریسکیو ہیلپ لائن 1299 سے رابطہ کر سکتے ہیں۔

بارش کے دوران شہر کے مختلف علاقوں میں بجلی کے متعدد فیڈرز بھی ٹرپ کر گئے جس کے باعث کئی علاقوں میں بجلی کی فراہمی متاثر ہوئی ہے۔

محکمہ موسمیات کے مطابق گرومندر، گارڈن، صدر، اولڈ سٹی ایریا، ناظم آباد، نارتھ ناظم آباد، نیو کراچی، گلشن اقبال، گلستان جوہر، اسکیم 33، ملیر، ماڈل کالونی، شاہ فیصل کالونی، ڈیفنس، کلفٹن، کورنگی اور لانڈھی سمیت مختلف علاقوں میں تیز بارش ریکارڈ کی گئی ہے۔