ایران کا امریکی طیارہ بردار جہاز پر حملے کا دعویٰ، خطے میں کشیدگی میں اضافہ

(ایران) نے دعویٰ کیا ہے کہ اس نے امریکی طیارہ بردار بحری جہاز USS Abraham Lincoln (CVN-72) کو کروز میزائلوں سے نشانہ بنایا، جبکہ ایک لڑاکا طیارہ بھی مار گرانے کا دعویٰ سامنے آیا ہے۔

ایرانی پاسداران انقلاب، اسلامی انقلابی گارڈ کور کے مطابق یہ کارروائی دشمن کے خلاف جاری آپریشن کی 91ویں لہر کا حصہ ہے، جس میں چار کروز میزائلوں کے ذریعے امریکی بحری جہاز کو نشانہ بنایا گیا۔

ایرانی بحریہ کا کہنا ہے کہ جزیرہ قشم کے قریب دشمن کا ایک لڑاکا طیارہ بھی مار گرایا گیا۔

رپورٹس کے مطابق ایران نے اسرائیل کے مختلف شہروں پر بھی میزائل حملے کیے، جہاں دفاعی نظام کو ناکامی کا سامنا کرنا پڑا اور کئی مقامات پر دھماکوں اور آگ لگنے کی اطلاعات ہیں۔

اس کے علاوہ اردن کے الازرق فوجی اڈے پر ڈرون حملے کا دعویٰ بھی کیا گیا ہے، جبکہ بحرین میں ایک کلاؤڈ فیسلٹی کو نشانہ بنانے کی بات بھی سامنے آئی ہے۔

ایرانی فوج کے ترجمان نے دعویٰ کیا ہے کہ مختلف حملوں میں متعدد امریکی فوجی ہلاک اور زخمی ہوئے ہیں، اور خبردار کیا ہے کہ امریکا اور اسرائیل مزید سخت کارروائیوں کے لیے تیار رہیں۔

تاہم ان دعوؤں کی آزاد ذرائع سے تصدیق نہیں ہو سکی، جبکہ امریکی حکام کی جانب سے تاحال کوئی باضابطہ ردعمل سامنے نہیں آیا ہے۔