ایران کا افزودہ یورینیم باہر بھیجنے سے صاف انکار، ٹرمپ کے دعوے مسترد

(تہران) ایران نے افزودہ یورینیم ملک سے باہر بھیجنے سے صاف انکار کرتے ہوئے امریکی صدر ڈونلڈ ٹرمپ کے دعوؤں کو مسترد کر دیا ہے۔

قطری نشریاتی ادارے الجزیرہ کے مطابق ایران کی قومی سلامتی کمیٹی کے ترجمان ابراہیم رضائی نے واضح کیا ہے کہ تہران افزودہ یورینیم کو ملک سے باہر بھیجنے کی کسی بھی تجویز کو قبول نہیں کرے گا اور اس حوالے سے کوئی وعدہ بھی نہیں کیا گیا۔

انہوں نے کہا کہ یورینیم کی افزودگی کو صفر کرنے یا پرامن ایٹمی پروگرام روکنے کی تمام تجاویز ایران کیلئے اسٹریٹجک ریڈ لائن ہیں اور انہیں مکمل طور پر مسترد کیا جاتا ہے۔

واضح رہے کہ امریکی صدر ڈونلڈ ٹرمپ مسلسل دعویٰ کر رہے ہیں کہ ایران اپنے افزودہ یورینیم کا ذخیرہ حوالے کر دے گا۔ ٹرمپ نے اپنے سوشل میڈیا پلیٹ فارم Truth Social پر جاری بیان میں کہا تھا کہ امریکا تمام ایٹمی مواد حاصل کر لے گا۔

دوسری جانب ایرانی وزارت خارجہ کے ترجمان اسماعیل بقائی نے بھی ان دعوؤں کو سختی سے مسترد کرتے ہوئے ایرانی خبر رساں ایجنسی تسنیم نیوز ایجنسی کو بتایا کہ افزودہ یورینیم ایرانی قوم کیلئے مقدس حیثیت رکھتا ہے اور اسے کسی صورت ملک سے باہر منتقل نہیں کیا جائے گا۔

ادھر تہران میں سینٹر فار مڈل ایسٹ اسٹریٹجک اسٹڈیز کے ماہر عباس اصلانی کے مطابق ایران ایٹمی پروگرام کی مستقل معطلی قبول نہیں کرے گا بلکہ وہ اپنی ضروریات کے مطابق ملک کے اندر افزودگی جاری رکھنا چاہتا ہے۔

دریں اثنا آبنائے ہرمز کھول دی گئی ہے، تاہم جہازوں کی آمد و رفت کیلئے نیا سکیورٹی منصوبہ تیار کیا جا رہا ہے۔