ہندو انتہا پسندوں کی دھمکیوں کے بعد عامر خان نے تیسری اہلیہ کے مذہب سے متعلق وضاحت کردی

(ممبئی) بالی ووڈ کے معروف اداکار عامر خان نے حالیہ انٹرویو میں اپنی تیسری اہلیہ گوری اسپرٹ کے مذہب سے متعلق وضاحت کرتے ہوئے کہا ہے کہ وہ ہندو نہیں بلکہ ایک عیسائی خاتون ہیں۔

عامر خان نے کہا کہ ان کی کسی بھی شادی میں مذہب کی تبدیلی نہیں ہوئی، کیونکہ انہوں نے اپنی تمام شادیاں سول میرج کے تحت کیں۔ ان کے مطابق پہلی اہلیہ رینا دتہ، دوسری اہلیہ کرن راؤ اور موجودہ اہلیہ گوری اسپرٹ، تینوں نے شادی کے بعد اپنا مذہب تبدیل نہیں کیا۔

اداکار نے اپنے خاندان کی مثال دیتے ہوئے کہا کہ ان کی دونوں بہنوں کی شادیاں ہندو خاندانوں میں ہوئی ہیں، جبکہ ان کے کزن منصور نے ایک عیسائی خاتون سے شادی کی۔ انہوں نے مزید بتایا کہ ان کی بیٹی نے بھی ایک ہندو شخص سے شادی کی ہے۔

عامر خان کا کہنا تھا کہ ان کے خاندان میں مختلف مذاہب سے تعلق رکھنے والے افراد کے درمیان رشتے موجود ہیں اور ہمیشہ ایک دوسرے کے عقائد کا احترام کیا گیا ہے۔

واضح رہے کہ عامر خان نے 1986 میں رینا دتہ سے شادی کی تھی، جو 2002 میں طلاق پر ختم ہوئی۔ اس کے بعد انہوں نے 2005 میں فلم ساز کرن راؤ سے شادی کی، تاہم دونوں 2021 میں علیحدہ ہو گئے۔ حالیہ عرصے میں اداکار نے گوری اسپرٹ سے تیسری شادی کی ہے۔

حال ہی میں عامر خان کو اپنی تیسری شادی کے بعد سوشل میڈیا پر تنقید اور بعض انتہا پسند عناصر کی جانب سے دھمکیوں کا بھی سامنا کرنا پڑا، جس کے بعد انہوں نے اپنے انٹرویو میں اس معاملے پر وضاحت پیش کی۔