امریکا کی مزید مذاکرات کی درخواست، ایران غور کر رہا ہے: عباس عراقچی

(سینٹ پیٹرز برگ) ایران کے وزیر خارجہ عباس عراقچی نے انکشاف کیا ہے کہ امریکا نے مزید مذاکرات کی درخواست کی ہے جس پر تہران سنجیدگی سے غور کر رہا ہے۔

سینٹ پیٹرز برگ میں صحافیوں سے گفتگو کرتے ہوئے عباس عراقچی نے کہا کہ ایران ایک سپر پاور کے سامنے ڈٹ کر کھڑا ہے اور واشنگٹن اپنے مقاصد میں کامیاب نہیں ہو سکا۔ ان کے مطابق امریکا کی جانب سے مزید مذاکرات کی درخواست اسی ناکامی کا اعتراف ہے۔

انہوں نے کہا کہ ایران اپنی قومی خودمختاری اور مفادات پر کوئی سمجھوتہ نہیں کرے گا، تاہم سفارتی راستے ہمیشہ کھلے رکھے جاتے ہیں اور اسی تناظر میں امریکا کی پیشکش پر غور کیا جا رہا ہے۔

ایرانی وزیر خارجہ نے روس کے کردار کو سراہتے ہوئے کریملن کا شکریہ ادا کیا اور کہا کہ حالیہ کشیدگی نے ثابت کیا ہے کہ ایران کے پاس روس جیسے مضبوط دوست اور اتحادی موجود ہیں۔

عباس عراقچی کا کہنا تھا کہ خطے کی صورتحال کے پیش نظر ایران اپنے اتحادیوں کے ساتھ روابط مزید مضبوط بنا رہا ہے جبکہ عالمی سطح پر اپنے مؤقف کو مؤثر انداز میں پیش کرنے کا عمل جاری رکھے ہوئے ہے۔