27 ستمبر کو پتا چلے گا ریاست اپنی رِٹ کیسے قائم کرتی ہے: طلال چودھری

اسلام آباد: وزیر مملکت برائے داخلہ طلال چودھری نے کہا ہے کہ 27 ستمبر کو پتا چل جائے گا کہ ریاست اپنی رِٹ کیسے قائم کرتی ہے۔

نجی ٹی وی کے پروگرام میں گفتگو کرتے ہوئے طلال چودھری نے کہا کہ پی ٹی آئی کے مجوزہ اسلام آباد مارچ کے دوران ریاست اپنی رِٹ قائم کرنے کے لیے تمام ضروری اقدامات کرنے کا اختیار رکھتی ہے۔

انہوں نے کہا کہ حکومت نہیں چاہتی کہ پی ٹی آئی کے دوبارہ اسلام آباد آنے پر سختی یا کسی قسم کے سخت رویے کی ضرورت پیش آئے، تاہم 27 ستمبر کی تاریخ آنے پر سب واضح ہوجائے گا کہ ریاست اپنی رِٹ کیسے قائم کرتی ہے۔

خیبرپختونخوا حکومت پر تنقید کرتے ہوئے طلال چودھری نے کہا کہ وزیراعلیٰ خیبرپختونخوا انسداد دہشتگردی سے متعلق وزیراعظم کے سہ ماہی اجلاسوں میں شرکت سے گریز کرتے ہیں، تاہم این ایف سی ایوارڈ میں حصہ بڑھانے اور فنڈز کے حصول کے لیے وفاق کو یاد کیا جاتا ہے۔

وزیر مملکت نے دعویٰ کیا کہ پی ٹی آئی کی صوبائی حکومت کو اب تک این ایف سی کے تحت 700 ارب روپے فراہم کیے جاچکے ہیں اور ان فنڈز کا حساب دینا صوبائی حکومت کی ذمہ داری ہے۔

انہوں نے کہا کہ صوبائی حکومت کو سیاسی دھرنوں اور مارچ کے بجائے حاصل ہونے والے فنڈز کے درست استعمال اور اپنی کارکردگی پر توجہ دینی چاہیے۔