الیکشن میں فارم 45 کی حفاظت عوام کرے،کوئی فارم 47 نہیں آئے گا: بلاول بھٹو

گلگت بلتستان کے ضلع شگر کی تحصیل گلاب پور میں انتخابی جلسے سے خطاب کرتے ہوئے چیئرمین پاکستان پیپلز پارٹی بلاول بھٹو زرداری نے کہا ہے کہ آئندہ انتخابات میں فارم 45 کی حفاظت عوام خود کریں گے اور کسی کو فارم 47 لانے کا موقع نہیں ملے گا، ملک میں شفاف اور منصفانہ انتخابات کا انعقاد یقینی بنایا جائے گا۔

بلاول بھٹو زرداری نے کہا کہ شگر پاکستان پیپلز پارٹی کا مضبوط قلعہ ہے اور اس بار بھی شگر کی نشست پیپلز پارٹی ہی جیتے گی۔ انہوں نے دعویٰ کیا کہ گزشتہ انتخابات میں گلگت بلتستان میں پیپلز پارٹی سے 9 نشستیں چھین لی گئی تھیں، تاہم عوام اب اپنے ووٹ کی حفاظت کریں گے۔

چیئرمین پیپلز پارٹی نے کہا کہ سندھ حکومت نے غریب عوام کو 20 لاکھ مکانات فراہم کیے ہیں اور شگر کے معدنیات و قدرتی وسائل پر سب سے پہلا حق مقامی عوام کا ہے۔ ان کا کہنا تھا کہ گلگت بلتستان کی ترقی پورے پاکستان، خصوصاً اسلام آباد کی ترقی سے جڑی ہوئی ہے۔

بلاول بھٹو نے امریکا کی جانب سے ایران پر مسلط جنگ کی مذمت کرتے ہوئے کہا کہ فیلڈ مارشل عاصم منیر نے ایران اور امریکا کے درمیان کشیدگی کے دوران اہم کردار ادا کیا جبکہ معرکۂ حق میں بھی نمایاں کارکردگی دکھائی۔

انہوں نے کہا کہ اٹھارویں آئینی ترمیم کے دائرہ کار میں گلگت بلتستان کو بھی دیگر صوبوں کے برابر حقوق دلانے کی ضرورت ہے۔ اگر آئینی ترمیم کی گئی تو گلگت بلتستان کے آئینی حقوق کا مسئلہ حل کیا جائے گا۔ انہوں نے مزید کہا کہ مستقبل میں گلگت بلتستان کے انتخابات پاکستان کے عام انتخابات کے ساتھ کرانے کی کوشش کی جائے گی۔

بلاول بھٹو زرداری نے امور کشمیر و گلگت بلتستان کی وزارت ختم کرنے کا مطالبہ کرتے ہوئے کہا کہ اس کے اختیارات گلگت بلتستان اسمبلی کو منتقل کیے جائیں تاکہ مقامی نمائندے اپنے فیصلے خود کر سکیں۔ انہوں نے کہا کہ پیپلز پارٹی کے منشور میں گلگت بلتستان کو حقِ حاکمیت اور حقِ ملکیت دینا شامل ہے۔