امریکا کو بی ایل اے اور مجید بریگیڈ کی بلیک لسٹنگ کیلئے پاکستان کا ساتھ دینا چاہیے، دی ڈپلومیٹ

(واشنگٹن) امریکی جریدے "دی ڈپلومیٹ" میں شائع ہونے والے ایک تجزیاتی مضمون میں کہا گیا ہے کہ امریکا کو اقوام متحدہ میں بلوچستان لبریشن آرمی (بی ایل اے) اور اس کی ذیلی تنظیم مجید بریگیڈ کو بلیک لسٹ کرنے کی پاکستانی کوششوں کی حمایت کرنی چاہیے۔

مضمون کے مطابق پاکستان اور چین نے بی ایل اے کو عالمی سطح پر سفارتی اور مالی طور پر تنہا کرنے کے لیے اقوام متحدہ سے رجوع کیا، تاہم امریکا کی جانب سے اس عمل میں تاخیر یا عدم پیش رفت مختلف سوالات کو جنم دیتی ہے، کیونکہ امریکا خود بی ایل اے اور مجید بریگیڈ کو دہشت گرد تنظیمیں قرار دے چکا ہے۔

تجزیے میں مؤقف اختیار کیا گیا ہے کہ افغانستان میں موجود مبینہ محفوظ ٹھکانے علاقائی سلامتی کے لیے خطرہ بنے ہوئے ہیں اور بی ایل اے اب صرف ایک مقامی شورش پسند گروہ نہیں رہی بلکہ خطے میں عدم استحکام پیدا کرنے کی صلاحیت رکھنے والی تنظیم میں تبدیل ہو چکی ہے۔

مضمون میں کہا گیا کہ اگر بی ایل اے کو اقوام متحدہ کی پابندیوں کی فہرست میں شامل کیا جائے تو اس کے اثاثے منجمد کرنے، عالمی سفری پابندیاں عائد کرنے اور اس کے مالی وسائل و بین الاقوامی نیٹ ورکس کو محدود کرنے میں مدد مل سکتی ہے۔

دی ڈپلومیٹ کے مطابق بی ایل اے ماضی میں چین پاکستان اقتصادی راہداری (سی پیک) سے متعلق منصوبوں، چینی شہریوں اور پاکستانی سول و عسکری اہداف پر حملوں میں ملوث رہی ہے، جبکہ اس کی بین الاقوامی سطح پر مبینہ سہولت کاری کو نہ روکا گیا تو مستقبل میں مزید خطرات جنم لے سکتے ہیں۔

مضمون میں یہ بھی کہا گیا ہے کہ بلوچستان کے معدنی ذخائر میں امریکی دلچسپی اور ممکنہ سرمایہ کاری کے تناظر میں مستقبل میں امریکی عملہ اور کاروباری مفادات بھی سیکیورٹی خطرات سے دوچار ہو سکتے ہیں، لہٰذا بی ایل اے کے خلاف ایک متوازن، مؤثر اور بین الاقوامی سطح پر مربوط حکمت عملی اختیار کرنا ضروری ہے۔

تجزیے کے مطابق علاقائی استحکام، سرمایہ کاری کے تحفظ اور دہشت گردی کے خلاف عالمی کوششوں کو مؤثر بنانے کیلئے بین الاقوامی تعاون ناگزیر ہے۔