پی ٹی آئی پارلیمانی پارٹی اجلاس: علی امین گنڈا پور سمیت 30 سے 35 ارکان غیر حاضر، بانی پی ٹی آئی عمران خان کی صحت پر تشویش کا اظہار

(پشاور) پاکستان تحریک انصاف کی پارلیمانی پارٹی کے اہم اجلاس میں متعدد ارکان اسمبلی کی عدم شرکت توجہ کا مرکز بن گئی، جبکہ بانی پی ٹی آئی عمران خان کی صحت اور ان سے ملاقاتوں کے معاملے پر بھی تشویش کا اظہار کیا گیا۔

ذرائع کے مطابق اجلاس میں پی ٹی آئی کے 92 ارکان اسمبلی میں سے 52 ارکان نے شرکت کی، جبکہ 30 سے 35 ارکان اجلاس میں شریک نہ ہو سکے۔ سابق وزیراعلیٰ خیبر پختونخوا علی امین گنڈا پور بھی اجلاس میں شریک نہیں ہوئے۔

اجلاس سے خطاب کرتے ہوئے وزیراعلیٰ سہیل آفریدی نے کہا کہ بانی پی ٹی آئی عمران خان سے ملاقات کی اجازت نہیں دی جا رہی، جس کے باعث پارٹی قیادت اور عوام میں تشویش پائی جاتی ہے۔ انہوں نے مطالبہ کیا کہ بانی پی ٹی آئی کا علاج ان کے اہل خانہ کی موجودگی میں کرایا جائے تاکہ صحت سے متعلق خدشات دور ہو سکیں۔

وزیراعلیٰ نے آئندہ مالی سال کے بجٹ کے حوالے سے کہا کہ حکومت عوام دوست بجٹ پیش کرے گی اور ترقیاتی منصوبوں میں بانی پی ٹی آئی کے ویژن کی عکاسی کی جائے گی۔

ذرائع کے مطابق اجلاس میں شریک نہ ہونے والے بعض ارکان اسمبلی بیرون ملک موجود تھے، جبکہ کچھ ذاتی مصروفیات کے باعث شرکت نہیں کر سکے۔ اس کے باوجود اجلاس میں متعدد ایسے ارکان نے شرکت کی جنہیں پارٹی کے ناراض دھڑوں میں شمار کیا جا رہا تھا۔

دوسری جانب حکومتی ذرائع نے دعویٰ کیا ہے کہ اجلاس میں تقریباً 72 ارکان نے شرکت کی، تاہم اس حوالے سے مختلف اعداد و شمار سامنے آنے کے باعث شرکاء کی حتمی تعداد پر ابہام برقرار ہے۔

سیاسی مبصرین کے مطابق اجلاس میں ارکان کی نمایاں غیر حاضری اور پارٹی قیادت کی جانب سے بانی پی ٹی آئی کی صحت کا معاملہ اٹھانا آئندہ سیاسی حکمت عملی اور پارٹی کے اندرونی معاملات کے تناظر میں اہم پیش رفت تصور کی جا رہی ہے۔