ٹرمپ کا شی جن پنگ اور پوتن کا ایران تنازع میں غیر جانبدار رہنے پر شکریہ

امریکی صدر ڈونلڈ ٹرمپ نے ایران سے متعلق جنگ بندی معاہدے پر دستخط کے بعد چینی صدر شی جن پنگ اور روسی صدر ولادیمیر پوتن کا شکریہ ادا کرتے ہوئے کہا ہے کہ دونوں رہنماؤں نے کشیدہ صورتحال کے دوران غیر جانبدار رویہ اختیار کیا۔

فرانس میں ہونے والے جی 7 کانفرنس کے موقع پر پریس کانفرنس سے خطاب کرتے ہوئے صدر ٹرمپ نے کہا کہ وہ چین اور روس کی قیادت کے تعاون اور محتاط طرزِ عمل کو سراہتے ہیں۔

انہوں نے کہا، "میں صدر شی جن پنگ کا شکریہ ادا کرنا چاہتا ہوں۔ میری ان سے ملاقات ہوئی تھی اور وہ مکمل طور پر غیر جانبدار رہے، جس کی میں قدر کرتا ہوں۔"

امریکی صدر نے مزید کہا کہ روسی صدر ولادیمیر پوتن نے بھی تنازع کے دوران غیر جانبدارانہ موقف اختیار کیا اور صورتحال کو مزید پیچیدہ بنانے کے بجائے تحمل کا مظاہرہ کیا۔

ٹرمپ کے مطابق، "میں ولادیمیر پوتن کا بھی شکریہ ادا کرنا چاہتا ہوں۔ وہ بھی بہت غیر جانبدار رہے، وہ ہمارے لیے صورتحال کو کہیں زیادہ مشکل بنا سکتے تھے۔"

صدر ٹرمپ نے اس موقع پر امید ظاہر کی کہ حالیہ جنگ بندی اور سفارتی پیش رفت خطے میں استحکام اور امن کے فروغ میں مددگار ثابت ہوگی، جبکہ عالمی طاقتوں کے ذمہ دارانہ رویے نے کشیدگی کو مزید بڑھنے سے روکنے میں اہم کردار ادا کیا۔