ایران سے مذاکرات یا جنگ؟ ٹرمپ نے قومی سلامتی اجلاس طلب کر لیا

امریکی صدر ڈونلڈ ٹرمپ نے ایران سے بڑھتی کشیدگی کے معاملے پر آج اہم قومی سلامتی اجلاس طلب کر لیا ہے، جس میں ایران کے خلاف ممکنہ فوجی کارروائی اور مذاکراتی حکمت عملی پر غور کیا جائے گا۔

امریکی میڈیا رپورٹس کے مطابق حالیہ مذاکرات کسی نتیجے پر نہ پہنچنے کے بعد واشنگٹن میں یہ تاثر مضبوط ہو رہا ہے کہ ایران اپنے جوہری پروگرام کے معاملے پر خاطر خواہ لچک دکھانے کے لیے تیار نہیں، جس کے بعد امریکی انتظامیہ دباؤ بڑھانے کے نئے آپشنز پر غور کر رہی ہے۔

رپورٹ کے مطابق صدر ٹرمپ بظاہر کسی بڑے تصادم سے گریز چاہتے ہیں اور ایک ایسے معاہدے کے خواہاں ہیں جو ایران کے جوہری پروگرام کو محدود کر سکے، تاہم امریکی مطالبات مسترد ہونے کے بعد وائٹ ہاؤس میں عسکری آپشنز دوبارہ اہمیت اختیار کر گئے ہیں۔

امریکی میڈیا کا کہنا ہے کہ اجلاس میں نائب صدر جے ڈی وینس،خصوصی مندوب اسٹیو وٹکوف، وزیر خارجہ مارکو روبیو، وزیر جنگ پیٹ ہیگسیتھ،سی آئی اے کے سربراہ جان ریٹکلیف اور چئیرمین جوائنٹ چیفس آف سٹاف جنرل ڈین کین کی شرکت متوقع ہے۔

رپورٹس میں دعویٰ کیا گیا ہے کہ صدر ٹرمپ ایران پر دباؤ بڑھانے اور نیوکلیئر پروگرام پر رعایتیں حاصل کرنے کیلئے کسی قسم کے محدود فوجی ایکشن کی جانب مائل ہو رہے ہیں۔

امریکی حکام کے حوالے سے بتایا گیا ہے کہ زیر غور تجاویز میں آبنائے ہرمز میں بحری نگرانی کے مشن کو دوبارہ فعال کرنا بھی شامل ہے، جبکہ ایران کے ان اہداف پر حملوں کی تجویز بھی زیر غور ہے جن کی نشاندہی پہلے ہی کی جا چکی ہے لیکن اب تک کارروائی نہیں ہوئی۔

دوسری جانب اسرائیل کی قیادت بھی واشنگٹن پر دباؤ ڈال رہی ہے کہ ایران کے افزودہ یورینیم ذخائر کو غیر مؤثر بنانے کیلئے خصوصی آپریشن پر غور کیا جائے، تاہم صدر ٹرمپ اس منصوبے کے ممکنہ خطرات کے باعث محتاط دکھائی دیتے ہیں۔

رپورٹ میں یہ بھی کہا گیا ہے کہ ایران سے متعلق امریکی فیصلوں پر ٹرمپ کے متوقع دورہ چین کے ممکنہ اثرات کو بھی اہم سمجھا جا رہا ہے کیونکہ واشنگٹن خطے میں کسی بڑے بحران سے پہلے عالمی سفارتی توازن کو مدنظر رکھنا چاہتا ہے۔

قبل ازیں صدر ٹرمپ یہ بیان دے چکے ہیں کہ ایران کے ساتھ جنگ بندی “لائف سپورٹ” پر ہے، جبکہ وہ ایران کی نئی تجاویز کو “احمقانہ” قرار دے کر مسترد بھی کر چکے ہیں۔