ہمارا مسودہ ٹرمپ کو خوش کرنے کیلئے نہیں، ایران کا امریکہ کو دوٹوک جواب

(تہران)غیر ملکی خبر رساں ادارے کے مطابق ایرانی حکام نے کہا کہ اگر صدر ٹرمپ ایران کے جواب سے مطمئن نہیں تو یہ ایران کے حق میں بہتر ہے، کیونکہ تہران اپنی پالیسی قومی مفاد کو مدنظر رکھتے ہوئے مرتب کرتا ہے۔

ایرانی حکام کا کہنا تھا کہ “ہمارا مسودہ ٹرمپ کو خوش کرنے کیلئے تیار نہیں کیا گیا، امریکی صدر کا ردعمل ہمارے لیے کوئی اہمیت نہیں رکھتا۔”

ذرائع کے مطابق ایرانی قیادت نے مذاکراتی ٹیم کو ہدایت دی ہے کہ وہ بات چیت کے دوران صرف ایرانی عوام اور قومی مفادات کو ترجیح دیتے ہوئے تجاویز پیش کرے۔

ایرانی خبر ایجنسی نے بھی اپنی رپورٹ میں کہا ہے کہ جنگ کے خاتمے سے متعلق امریکی تجویز پر ایران کے جواب کے حوالے سے صدر ٹرمپ کا ردعمل غیر اہم ہے، کیونکہ ایران کسی بیرونی دباؤ کے تحت فیصلے نہیں کرتا۔

واضح رہے کہ اس سے قبل امریکی صدر ڈونلڈ ٹرمپ نے اپنے سوشل میڈیا پلیٹ فارم “ٹروتھ سوشل” پر جاری بیان میں کہا تھا کہ انہوں نے ایران کے نام نہاد نمائندوں کی جانب سے دیا گیا جواب پڑھا ہے جو انہیں “بالکل پسند نہیں آیا” اور وہ “مکمل طور پر ناقابل قبول” ہے۔

امریکا اور ایران کے درمیان حالیہ بیانات کے بعد سفارتی کشیدگی میں مزید اضافے کا امکان ظاہر کیا جا رہا ہے، جبکہ عالمی برادری صورتحال پر گہری نظر رکھے ہوئے ہے۔