ایرانی سپریم لیڈر مجتبیٰ خامنہ ای کا حکومت کو ایران کی طاقت اور مزاحمت اجاگر کرنے کا حکم

تہران: ایرانی سپریم لیڈر مجتبیٰ خامنہ ای نے حکومت کو ہدایت کی ہے کہ ایران کی طاقت، مزاحمت اور قومی استحکام کو مؤثر انداز میں اجاگر کیا جائے اور ایسے بیانات سے گریز کیا جائے جو قوم کے حوصلے کو کمزور کریں۔

جاری بیان میں ایرانی سپریم لیڈر نے کہا کہ کوئی ایسا بیان یا اقدام نہ کیا جائے جس سے عوام کے حوصلے متاثر ہوں یا ملک میں سماجی اتحاد کو نقصان پہنچے۔

مجتبیٰ خامنہ ای نے حکومت کو معاشی مشکلات کے حل کے لیے مؤثر اقدامات کی ہدایت دیتے ہوئے کہا کہ ایران کی کمزوریوں کو غیر ضروری طور پر نمایاں کرنے سے دشمن کو فائدہ پہنچ سکتا ہے۔

انہوں نے زور دیا کہ حکومت عوام کو درپیش بنیادی معاشی مسائل کے حل پر توجہ دے اور مہنگائی، بے روزگاری اور اشیائے ضروریہ کی بڑھتی قیمتوں پر قابو پانے کے لیے عملی اقدامات کرے۔

ایرانی سپریم لیڈر کا کہنا تھا کہ قومی اتحاد اور عوامی حوصلے کو برقرار رکھنا موجودہ حالات میں انتہائی اہم ہے، جبکہ حکومت کو معاشی چیلنجز سے نمٹنے کے لیے اپنی ذمہ داریاں مؤثر انداز میں ادا کرنا ہوں گی۔