ٹرمپ کا وینزویلا کے ساتھ دنیا کی تاریخ کے سب سے بڑے تیل معاہدے کا اعلان، 65 ارب بیرل ذخائر پر اکثریتی کنٹرول کا دعویٰ

واشنگٹن: امریکی صدر ڈونلڈ ٹرمپ نے اعلان کیا ہے کہ امریکا نے وینزویلا کے ساتھ دنیا کی تاریخ کا سب سے بڑا تیل کا معاہدہ کر لیا ہے۔

صدر ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ ان کی ہدایت پر وزیر خارجہ مارکو روبیو اور وزیر جنگ پیٹ ہیگسیتھ نے وینزویلا کی عبوری صدر ڈیلسی روڈریگیز کے ساتھ نجی شعبے کی شراکت سے یہ معاہدہ طے کیا۔

ٹرمپ نے دعویٰ کیا کہ معاہدے کے تحت امریکا نے وینزویلا کے 65 ارب بیرل سے زائد ثابت شدہ تیل کے ذخائر پر اکثریتی کنٹرول حاصل کر لیا ہے۔ ان کے مطابق یہ معاہدہ امریکی تیل کے ذخائر میں نمایاں اضافہ کرے گا اور مستقبل میں تیل کی رسد بڑھنے سے امریکی شہریوں کے لیے پیٹرول کی قیمتوں میں کمی کا امکان پیدا ہوگا۔

امریکی صدر کا کہنا تھا کہ یہ معاہدہ وینزویلا کو معاشی ترقی اور خوشحالی کی جانب لے جانے میں بھی مددگار ثابت ہوگا، جبکہ دونوں ممالک کے درمیان تعلقات مزید مضبوط ہوں گے۔

امریکی وزیر خارجہ مارکو روبیو نے بھی معاہدے کو دونوں ممالک کے لیے بڑی کامیابی قرار دیا۔ ان کا کہنا تھا کہ معاہدے کے نتیجے میں مغربی نصف کرۂ ارض میں مستحکم تیل کے ذخائر اور نسبتاً کم لاگت توانائی کی فراہمی ممکن ہو سکے گی، جبکہ امریکا میں ایندھن کی قیمتوں پر بھی مثبت اثر پڑنے کی توقع ہے۔

دوسری جانب وینزویلا کی عبوری صدر ڈیلسی روڈریگیز نے کہا کہ معاہدے کے تحت نجی کمپنیوں کی شمولیت سے ملک میں تیل کی پیداوار میں نمایاں اضافہ کیا جائے گا۔ انہوں نے بتایا کہ تیل کے 17 اہم شعبوں کو ترقی دی جائے گی، جہاں مجموعی طور پر 65 ارب بیرل تیل کے ثابت شدہ امکانات موجود ہیں۔

ڈیلسی روڈریگیز کے مطابق ان منصوبوں میں 100 ارب ڈالر سے زائد کی سرمایہ کاری متوقع ہے، جس سے وینزویلا کی تیل کی صنعت کی بحالی اور جدید کاری میں مدد ملے گی۔ ان کا کہنا تھا کہ یہ سرمایہ کاری ملکی معاشی ترقی، خطے کی توانائی سلامتی اور عالمی تیل کی منڈی میں زیادہ توازن پیدا کرنے میں بھی معاون ثابت ہو سکتی ہے۔