فیفا ورلڈ کپ: ایران کا میچز امریکا سے میکسیکو منتقل کرنے کا مطالبہ

(تہران)غیر ملکی خبر رساں ایجنسی کے مطابق ایرانی وزیر کھیل احمد دونیا مالی نے اپنے بیان میں کہا کہ انہیں خدشہ ہے کہ ایرانی کھلاڑی امریکا میں محفوظ نہیں ہوں گے۔ انہوں نے مطالبہ کیا کہ ٹیم کی سیکیورٹی کو یقینی بنانے کیلئے میچز کی میزبانی امریکا سے میکسیکو منتقل کی جائے۔

ایرانی وزیر کھیل کا کہنا تھا کہ موجودہ کشیدہ صورتحال کے باعث ٹیم کی حفاظت اولین ترجیح ہے اور اس حوالے سے فیفا کو فوری اقدامات کرنے چاہئیں۔

دوسری جانب امریکی صدر ڈونلڈ ٹرمپ بھی اس حوالے سے بیان دے چکے ہیں کہ ایران کا امریکا میں کھیلنا سیکیورٹی خطرات کا باعث بن سکتا ہے۔ تاہم اس کے باوجود فیفا نے ایران کے میچز منتقل کرنے سے انکار کر دیا ہے۔

رپورٹس کے مطابق ایران کے میچز نیوزی لینڈ، بیلجیم اور مصر کے خلاف امریکا کے شہروں کیلیفورنیا اور سیاٹل میں شیڈول ہیں۔

واضح رہے کہ فیفا ورلڈ کپ امریکا، میکسیکو اور کینیڈا میں 11 جون سے شروع ہو کر 19 جولائی تک جاری رہے گا، جس میں دنیا بھر کی ٹیمیں شرکت کریں گی۔