آبنائے ہرمز پر بحری جہازوں کی آمدورفت جاری، دشمن نے ایران کی طاقت کا غلط اندازہ لگایا: پاسدارانِ انقلاب

(تہران) ایران نے دعویٰ کیا ہے کہ اس کی نگرانی میں آبنائے ہرمز پر بحری جہازوں کی آمدورفت بلا تعطل جاری ہے، جبکہ پاسدارانِ انقلاب کے حکام کا کہنا ہے کہ حالیہ کشیدگی کے باوجود ایران خطے میں مضبوط پوزیشن برقرار رکھے ہوئے ہے۔

پاسدارانِ انقلاب کے مطابق گزشتہ 24 گھنٹوں کے دوران مزید 28 بحری جہازوں نے آبنائے ہرمز کو کامیابی سے عبور کیا، جس سے اس اہم عالمی آبی گزرگاہ میں بحری سرگرمیوں کے تسلسل کی نشاندہی ہوتی ہے۔

پاسدارانِ انقلاب کے سیاسی امور کے نگران یداللہ جوانی نے کہا کہ 40 روزہ جنگ کے دوران دشمن نے ایران کی عسکری اور دفاعی صلاحیتوں کا غلط اندازہ لگایا۔ ان کے مطابق آبنائے ہرمز میں ایران کی مؤثر برتری ثابت ہو چکی ہے اور ملک پہلے سے زیادہ مضبوط پوزیشن میں کھڑا ہے۔

انہوں نے دعویٰ کیا کہ امریکا اور اسرائیل اس عرصے کے دوران کمزور ہوئے ہیں جبکہ خطے میں طاقت کا توازن ایران کے حق میں تبدیل ہو چکا ہے۔

یداللہ جوانی کا کہنا تھا کہ ایران اپنی دفاعی حکمت عملی اور علاقائی اثر و رسوخ کے باعث اہم اسٹریٹجک برتری حاصل کیے ہوئے ہے، جس کا اظہار آبنائے ہرمز میں بحری نقل و حرکت کے تسلسل سے بھی ہوتا ہے۔

آبنائے ہرمز دنیا کی اہم ترین تجارتی آبی گزرگاہوں میں شمار ہوتی ہے، جہاں سے عالمی تیل تجارت کا بڑا حصہ گزرتا ہے، اس لیے اس علاقے کی صورتحال پر عالمی منڈیوں اور علاقائی طاقتوں کی گہری نظر رہتی ہے۔