ایران کا بحرین اور کویت میں امریکی تنصیبات پر حملے کا دعویٰ، کشیدگی میں مزید اضافہ

تہران: ایران نے امریکی حملوں کے جواب میں بحرین اور کویت میں امریکی فوجی تنصیبات کو میزائلوں اور ڈرونز کے ذریعے نشانہ بنانے کا دعویٰ کیا ہے، جس کے بعد خطے میں کشیدگی مزید بڑھ گئی ہے۔

ایرانی خبر رساں اداروں تسنیم اور پریس ٹی وی کے مطابق پاسدارانِ انقلاب (آئی آر جی سی) کی جانب سے جاری بیان میں کہا گیا ہے کہ ایرانی نیوی اور ایرو اسپیس فورس نے مشترکہ کارروائی کرتے ہوئے بحرین اور کویت میں موجود امریکی تنصیبات کو میزائل اور ڈرون حملوں کا نشانہ بنایا۔

بیان میں کہا گیا کہ یہ کارروائی ایران پر حالیہ امریکی حملوں کے جواب میں کی گئی ہے، جبکہ ایران نے امریکی اقدامات کو "اسلام آباد مفاہمتی یادداشت" کی شق نمبر 1 کی خلاف ورزی قرار دیتے ہوئے خبردار کیا کہ اس کے نتیجے میں سفارتی عمل مکمل طور پر معطل کیا جا سکتا ہے۔

پاسدارانِ انقلاب نے مزید کہا کہ اگر ایران کے خلاف دوبارہ کوئی کارروائی کی گئی تو اس کا پہلے سے زیادہ سخت اور فیصلہ کن جواب دیا جائے گا۔

دوسری جانب بحرین اور کویت سمیت متعلقہ حکام کی جانب سے صورتِ حال پر مختلف بیانات سامنے آ رہے ہیں، جبکہ خطے میں سیکیورٹی صورتحال پر گہری نظر رکھی جا رہی ہے۔